«Թե իմ անձնական փորձից, թե նաև մեր գործընկերների հավաստիացումներից կարող եմ ասել, որ այս վերջին շաբաթներին մաքսավորները բավականին թափանցիկ են սկսել աշխատել, տնտեսվարողներն արդեն հնարավորություն ունեն ինվոյսային արժեքով մաքսազերծել իրենց ապրանքները և բացի այդ էլ հսկիչ գներն այլևս առաջվանը չեն, այսինքն դրանք վերանայվել են, այլևս չեն ուռճացվում և նորմալ, ընդունելի հսկիչ գներ են սահմանվել»,- «Առաջին լրատվական»-ի հետ զրույցում նշեց «Կասեցում» քաղաքացիական նախաձեռնության համակարգող, գործարար Սամսոն Գրիգորյանը։
Վերջինիս պնդմամբ, այսուհանդերձ, առ այսօր շարունակում է առկա լինել մի կարևորագույն խնդիր, որին ՊԵԿ-ը պետք է ուշադրություն դարձնի։ Գործարարը մանրամասնեց․ «Եթե հանձնարարական է բացվում որևէ տնտեսվարողի վրա, ապա ՊԵԿ-ի տեսուչը, անպայման, պետք է այդ հանձնարարականը տուգանքով փակի՝ բոլոր հնարավոր և անհնարին միջոցներով և դեպքերի մեծամասնությամբ՝ անգամ կարգի խախտմամբ այդ տեսուչը հասնում է նրան, որ տուգանում են տնտեսվարողին․ իհարկե ՝ չարդարացնելով ՀԴՄ կտրոն չտրամադրող տնտեսվարողին, այդուհանդերձ, ուզում եմ նշել, որ ինչպես տնտեսվարողն է պարտավոր աշխատել օրենքի դաշտում, այնպես էլ ՊԵԿ-ն ու իր հարկային տեսուչները, որովհետև չի կարելի օրենքի խախտումով հասնել օրենքի գերակայության․ դրա համար, միանշանակ, թե ՊԵԿ-ի, թե տնտեսվարողների կողմից պետք է հետևի օրենքի տառը և ամեն ինչ արվի օրենքի շրջանակներում»։
Գործարարի համոզմամբ՝ նոր կառավարությունը չի սատարելու կաշառակերներին, ինչպես անում էր նախորդ ղեկավարությունը։
«Նախորդ կառավարության ժամանակ կաշառքի հրամանն ամենավերին օղակներից էր գալիս»,- շեշտեց Սամսոն Գրիգորյանը։
Մանրամասները՝ տեսանյութում։
