«Յուրաքանչյուրիս համար տարբեր նպատակ ունի Հայաստան վերադառնալը. պետք է ընտրել կյանքի իմաստը, կյանքի ոճը, նպատակները և որոշել՝ որտեղ դրանք իրականացնել»,- «Առաջին լրատվական»- ի հետ զրույցում այս մասին ասաց 15 տարի առաջ հայրենիք վերադարձած կանդահայ գործարար Րաֆֆի Նիզիբլյանը և հավելեց. «Ես և կինս Հայաստան եկանք որպես կամավորներ՝ «Երկիր և մշակույթ» ծրագրով: Ղարաբաղցիների հետ վերանորոգում էինք Քարինտակի եկեղեցին: Նրանց սիրեցինք, իրենց ցավը և ուրախությունը կիսեցինք և հասկացանք, որ այստեղ ենք ուզում մեր ընտանիքի ապագան տեսնել: Ունեինք երկու աղջիկ, Հայաստանում ունեցանք երկու տղա: Մենք այն սփյուռքահայ ընտանիքներից ենք, որ ոչ թե մեր հայրենիքը վիրտուալ տեսանք կամ պահեցինք մեր սրտում, այլ ունեցանք մեր հայրենիքը մեր առօրյայում»:
Կանադահայ գործարարի խոսքով՝ աշխարհի որ ծայրում էլ ծնվես, մեծանաս ու հաջողություններ ունենաս, միևնույն է՝ քեզ հայ ես զգում, մնում ես հայ: «Մենք անկախ պետություն ենք ստացել, և թե ինչ կժառանգենք մեր սերունդներին, դա մեզնից է կախված: Մենք պետք է մեր երեխաներին հնարավորություն տանք»,- նշեց մեր զրուցակիցը:
Նրա դիտարկմամբ՝ հայկական թավշյա հեղափոխության մոդելը յուրահատուկ է. «Այդ պարն ու երգը մեր հեղափոխությունը տոնական հեղափոխություն դարձրեցին: Դա մեծ հպարտություն է: Առաջիկա տարիներին բոլորի հայացքը մեզ վրա է լինելու»:
Նիզիբլյանը կոչ արեց թևերը վերև բարձրացնել և իրականում աշխատել: Նրա կարծիքով՝ Հայաստանը կարող է ուժեղանալ նաև ներգաղթի շնորհիվ, և ինչքան խելացի, նոր մտածելակերպով, ոչ միայն գումարով, այլ նաև փորձով հարուստ հայեր վերադառնան, այդ ամենը ներդրում կլինի Հայաստանի համար:
Մանրամասները՝ տեսանյութում:
