Կան պատգամավորներ և քաղաքական գործիչներ, ովքեր ամեն րոպե իրենք իրենց հակասում են: Պետք չէ Հռոմի պապից ավելի կաթոլիկ երևալ: Այս մասին «Առաջին լրատվական»- ի հետ զրույցում ասաց «Ելք» խմբակցության պատգամավոր Հովհաննես Աղազարյանը ՝ անդրադառնալով այսօր ԱԺ-ում «ՀՀ քրեական օրենսգրքում փոփոխություններ կատարելու մասին» օրենքի նախագծի քննարկման ժամանակ հնչած կարծիքներին: Պատգամավորը հավելեց, որ մասնավորապես ինքն իրեն հակասում էր նախկին դատախազ Գևորգ Կոստանյանը:
Հ. Ազարյանը նշեց՝ նախկինում երազել է, որ Հայաստանը վերջապես անցնի խորհրդարանական կառավարման համակարգի, սակայն ըստ նրա, վարչապետի որոշ լիազորություններ պետք է սահմանափակվեն: Նրա կարծիքով՝ հեղափոխության պրոցեսը դեռևս ընթանում է, և այս խորհրդարանին ևս պետք է որոշ լիազորություններից ազատել:
Վերադառնալով Հայաստանում քաղբանտարկյալների առկայության և նրանց ազատ արձակման հարցին՝ պատգամավորը նշեց. «Քաղբանտարկյալներ կան, և նրանց խափանման միջոցը պետք է փոխել: Գլխավոր դատախազի ինստիտուտը իրեն ճիշտ չի պահում, գլխավոր դատախազը կարող է «Սասնա ծռերի» առնվազն 80 տոկոսի խափանման միջոցը փոխել, բայց չի անում, որպեսզի նորընտիր իշխանությունների հանդեպ բացասական լիցքեր սերմանի»:
Պատգամավորը «Սասնա ծռերին» և նրանց հարազատներին կոչ արեց մի փոքր էլ դիմանալ՝ ընդգծելով, որ ամենակարևորը օրենքի պետություն ունենալն է: Նրա խոսքով՝ պետք է նոր, ավելի բարձր հանգրվանի գալ. հեղափոխություն չի նշանակում քանդել, ավերել, ոչնչացնել, այլ առաջին հերթին նշանակում է նոր ձևով մտածել:
Աղազարյանի դիտարկմամբ՝ հակահեղափոխությունը գործում է բավականին համակարգված և դիրքային պայքար է գնում, սակայն ՀՀԿ-ին չի հաջողվի հասնել նրան, որ ժողովուրդը հիասթափվի նոր իշխանություններից:
Մանրամասները՝ տեսանյութում:
