Վնասակար համակարգչային ցանցը, որի գործողություններից տուժել են համացանցի ավելի քան 2 մլն օգտատերեր, վնասազերծվել է Եվրոպոլի կողմից՝ Գերմանիայի, Լատվիայի, Լյուքսեմբուրգի, Շվեյցարիայի և Նիդերլանդների իրավապահ մարմինների հետ համագործակցությամբ:
Օպերացիայի նախաձեռնողներն ու նրա անմիջական մասնակիցներն են Microsoft ընկերության՝ թվային հանցագործությունների դեմ պայքարի բաժնի և մի շարք այլ ընկերությունների մասնագետներ: Այս մասին հայտնում է ITAR-TASS-ը՝ հղում անելով ԵՄ ոստիկանական ծառայությանը:
«Ակնթարթային հասանելիություն» անվանումով բոտ-ցանցը (ցանց՝ կազմված վարակված համակարգիչներից, որը կարող է հեռակառավարվել՝ սպամի ուղարկման, հարձակումների իրականացման և այլ վնասակար գործողությունների համար) ողջ աշխարհում վարակել է ավելի քան 2 մլն համակարգիչ:
Դրա գործողությունների հետևանքով համացանցում հայտարարություններ տեղադրող ընկերությունների կրած վնասը կազմում է ամսական ավելի քան 2.7 մլն դոլար: Այն խափանել է գովազդատուի և որոնողական համակարգի միջև կապը՝ փոխանցվող գումարը տեղավորելով չարագործների հաշվի վրա:
