1988թ-ի ավերիչ երկրաշարժից առ այսօր 52-ամյա Մարիամ Սաֆարյանն իր ամուսնու հետ միասին ապրում է Գյումրու ավտոկայանի հարևանությամբ գտնվող տնակային թաղամասում։ Նրա երեք որդիները ծառայել են ԼՂՀ տարածքում, սակայն այսօր գտնվում են Ռուսաստանի Դաշնությունում՝ Հայաստանում աշխատանք չունենալու պատճառով, իսկ դուստրը՝ իր անչափահաս երեխայի հետ միասին ապրում է ծնողների հարևանությամբ՝ մեկ այլ տնակում։
Խոնավ ու ցուրտ տնակը ջեռուցում են վառելափայտով, որը որպես օգնություն ստանում են «Շիրակ» հայրենակցական միությունից, իսկ ամսական նպաստը կազմում է ընդամենը 23 հազար դրամ։
«Առաջին լրատվական»-ի հետ զրույցում տիկին Մարիամը պատմեց, որ ֆիզիկական ծանր աշխատանք չի կարող անել՝ վիրահատված է, ունի հաշմանդամության կարգ, սակայն այլ աշխատանք լինելու դեպքում՝ կաշխատի, քանի որ օրվա ապրուստը վաստակելու խնդիր կա, իսկ Գյումրիում գործազուրկները շատ են։ Նա նաև նշեց, որ Նիկոլ Փաշինյանի ու նոր կառավարության հետ մեծ հույսեր են կապում, շատ են ուրախացել տեղի ունեցած իշխանափոխությունից ու իրենց հերթին պայքարել՝ այդ փոփոխություններին հասնելու համար։
«Նախորդ կառավարությունից հույս չենք ունեցել, որովհետև գիտեինք գումարները ուր կերթար, ինչի վրա կծախսեին, գիտեինք, որ մեզ ուշադրություն չեն դարձնի, մեզ բնակարան չեն տա, բայց հիմա որ կառավարությունը փոխվեց ՝ հույս կա, որ տեղաշարժ կլինի, մեզ բնակարան կտան ու վերջապես էս դոմիկից դուրս կուգանք, մարդավայել կապրենք։ Իմ տղաները օտարության մեջ վարձով մի կերպ կապրին, կաշխատին, էն էլ մեկ գործ կա իրանց ձեռը, մեկ՝ չկա, չգիտենք վերջը ինչ պիտի լինի։
Մենք ողորմություն չենք ուզում, մենք մենակ կուզենք մեր կորցրածը մեզ տան, որ ապրենք մարդու պես, մինչև հիմա չենք ապրել»,- ասաց Մարիամ Սաֆարյանը։
Մանրամասները՝ տեսանյութում։
