Չնայած սաստիկ ցրտին, կառավարության մոտ այսօր շարունակվեցին ամենշաբաթյա ակցիաները: Դալմայի այգիների նախկին հողօգտագործողները նույնպես շարունակեցին իրենց ակցիան:
«Դալմա-Սոնա» հիմնադրամի նախագահ Ռուզաննա Ղազարյանը «Առաջին լրատվական»-ի հետ զրույցում նշեց, որ պայքարելու են մինչև վերջ: Նա տեղեկացրեց, որ մի քանիսին փոխհատուցում տվել են, իսկ «նրանք, ովքեր խելոք են, չեն ասում՝ կգանք ձեր գլուխը կջարդենք, նրանց փոխհատուցման հարցը քնել է»:
Նա, իհարկե, հուսադրող է համարում այն, որ որոշ մարդկանց փոխհատուցում տվել են, քանի որ պարտավոր են նաև մյուսներին տալ, մինչդեռ ասում են՝ փող չունենք:
Ի սկզբանե Դալմայի այգիների հողօգտագործողները թիվը հասնում էր 1800-ի, մի մասը փոխհատուցում ստացավ, մյուս մասը մեկնեց արտասահման, հիմա 30 հոգի են մնացել:
Դալմայի այգիների մեծ մասը, նրանց խոսքով, պատկանում է Սամվել Ալեքսանյանին, նախկին դատախազ Աղվան Հովսեփյանին ու նրա եղբորը, ինչպես նաև ՀՀԿ-ական պատգամավոր Հերմինե Նաղդալյանին, ով, նրանց խոսքով, հավանաբար սպասում է ռուսական եկեղեցին կառուցվի, որ տարածքը եկեղեցուն վաճառի հսկայական գումարով:
Տարոն Մարգարյանն էլ, ինչպես միշտ, հուսադրում է բնակիչներին՝ հավաստելով, որ եթե նախորդ քաղաքապետերը ոչինչ չեն արել խնդրի կարգավորման ուղղությամբ, հիմա ինքը պետք է միջոցներ գտնի փոխհատուցում տալու համար:
