ԱՄՆ դեսպանատունը Թել Ավիվից Երուսաղեմ տեղափոխելու մասին Միացյալ Նահանգների նախագահ Դոնալդ Թրամփի որոշումը հակասում է միջազգային իրավունքին։ Այդ մասին Ստամբուլում Իսլամական համագործակցության կազմակերպության արտահերթ գագաթնաժողովի ժամանակ ասել է Ադրբեջանի արտգործնախարար Էլմար Մամեդյարովը, հաղորդում է Trend-ը։
Մամեդյարովի խոսքով՝ չնայած բազմաթիվ նախազգուշացումներին, ԱՄՆ քայլը նվազեցրել իսրայելապաղեստինյան հակամարտությունն արդար և դյուրին կերպով կարգավորելու հնարավորությունները։
Նախարարը նշել է, որ ավելի քան 60 պաղեստինցու մահվան և շուրջ 2000-ի վիրավորվելու փաստը մարդկային ըմբռնման շրջանակից դուրս է։
«Պաղեստինաիսրայելական հակամարտությունը պետք է լուծվի խաղաղ ճանապարհով և երկու պետության սկզբունքով՝ Արևելյան Երուսաղեմը Պաղեստինի մայրաքաղաք ճանաչելով»,-ասել է նախարարը։
Մայիսի 14-ին Իսրայելում տեղի է ունեցել ԱՄՆ դեսպանատան՝ Թել Ավիվից Երուսաղեմ տեղափոխումը, ինչը լուրջ բախումների մեկնարկի պատճառ է դարձել Գազայի գոտում։ Պաղեստինցի ցուցարարների և իսրայելցի ուժայինների բախումների հետևանքով 62 մարդ է զոհվել։
