Կրթության և գիտության նախարար Արայիկ Հարությունյանը ֆեյսբուքյան իր էջում երեկ գրառում էր կատարել՝ տեղեկացնելով, որ անսպասելի այցելել է թիվ 189 դպրոց և մասնակցել ծնողական ժողովի: «Ասե՞լ էի, որ դրամահավաքի յուրաքանչյուր դեպք հայտնաբերվելու է։ Ասե՞լ էի, որ ոստիկանություն եմ հանձնելու։ 189 դպրոցում այսօր այդ օրն էր»,-գրել է նախարարը:
https://www.facebook.com/hovhannes.hovhannisyan/videos/10156203673301093/UzpfSTEwMDAwMTQ2NjY5NTM4ODoxODI1MTg2NjQwODczNTQx/
Հրապարակված տեսանյութում երևում է, թե ինչպես է նախարարը այցելում դպրոց և մասնակցում ծնողական ժողովի: Ծնողները նախ հերքում են դրամահավաքի մասին լուրերը, ապա, տնօրենի գալուց հետո խոստովանում, որ վերջին զանգի համար 15 000-ական դրամ են հավաքել:
Տեսանյութում ծնողները պնդում են, որ իրենք են նախաձեռնել և 15 հազար դրամ հավաքել են դահլիճի զարդարման, խնջույքի համար, ծնողներից մեկն էլ տեղից արձագանքում է, թե ասել են նաև տնօրենի համար պիտի գումար տան, տնօրենը հերքում է դա:
Արայիկ Հարությունյանը թիվ 189 դպրոցում դրամահավաքի դեպքերի նյութերը փոխանցել է ոստիկանապետ Վալերի Օսիպյանին։ Սակայն երբ նախարարը վերադարձել է ԿԳՆ, դպրոցի մի քանի ծնողներ բողոքի ակցիա են արել շենքի մոտ, նախարարին մեղադրել շոու անելու մեջ։
Սկսենք նրանից, որ հրապարակային ցանկացած միջոցառում, այդ թվում` կոռուպցիայի բացահայտում, իր մեջ շոուի բաղադրիչ է պարունակում: Տվյալ դեպքում` բողոքող ծնողներն ոչ թե հերքում են դրամահավաքության փաստը, այլ նախարարին մեղադրում են, ըստ էության, այն հարցում, որ նա, այսպես ասած, հայավարի չի կոծկել փաստը: Մյուս կողմից` եթե Արայիկ Հարությունյանը ընդհանրական ձևակերպումներով խոսեր կրթական համակարգում կոռուպցիոն երևույթների մասին, ապա նրան մեղադրելու էին պոպուլիզմի մեջ` արդարացիորեն նշելով կոնկրետ փաստերի բացակայությունը:
Տվյալ պարագայում` ավելի լավ է շոու սարքել, քան պոպուլիստ լինել, մանավանդ, որ ծաղիկը երբեմն կոռուպցիոն «բուրմունք» է ունենում:
Սակայն գոյություն ունի նաև մեդալի հակառակ կողմը: Համոզված ենք, որ տարեվերջյան այս օրերին դրամահավաքության համատարած երևույթներ կան հանրապետության գրեթե բոլոր դպրոցներում. եթե դրանցից մեկի տնօրենն է ենթարկվում հանրային պախարակման և ինստիտուցիոնալ մեխանիզմներ չեն ստեղծվում դպրոցներում ապօրինի դրամաշրջանառությունը կանխելու նպատակով, կարող է ընտրողական վերաբերմունքի կարծիք ձևավորվել: Հուսանք` շուտով կառավարությունը հստակ մոտեցում կներկայացնի, թե ինչպես է կրթական համակարգը ձերբազատում կոռուպցիոն ռիսկերից` չմոռանալով նաև քայլերի մասին, որոնք ուղղված կլինեն ուսուցիչների սոցիալական պաշտպանության մեխանիզմների ձևավորմանը:
Սակայն երեկ ամենից շատ մտահոգեց ծնողների, այսինքն` հասարակության պահվածքը: Նույնիսկ թավշյա հեղափոխությունը մեր հասարակության մի զգալի հատվածի մոտ չի հաղթահարել կոռուպցիոն մենթալիտետը, ինչի հետևանքով առայժմ տեսական են դատողությունները նոր Հայաստանի և նոր մտածողության մասին:
