Ես այն հազվագյուտ պատգամավորներից եմ, ով իր շփումներում ու ելույթներում սրում էր հարցը, թե ոչ միայն էական է, թե ով կլինի վարչապետ, այլ նաև, թե ովքեր կլինեն կառավարությունում առանցքային նախարարները: Այդ մասին «Առաջին լրատվական»-ի հետ զրույցում նշել է ԱԺ ՀՀԿ խմբակցության պատգամավոր Խոսրով Հարությունյանը:
«Ով կլինի պաշտպանության նախարարը, ֆինանսների նախարարը, ԱԳ նախարարը, փոխվարչապետը, որը պետք է տաներ տնտեսական քաղաքականությունը: Ցանկացած կառավարության հաջողությունը Հայաստանում կախված է իմ նշած կարևորագույն դերակատարում ունեցող քաղաքական անձանցից»,- ասաց նա:
Խոսրով Հարությունյանի խոսքերով՝ այդ ոլորտներում նշանակված անձինք տիրապետում են առարկային. «Թե ինչպիսին կլինի նրանց վարած քաղաքականությունը, մեծ մասամբ պայմանավորված կլինի քաղաքական թիմի առաջնահերթություններով: Այդ մարդիկ պետք է իրականացնեն վարչապետի քաղաքականությունը: Հիմա շատ էական է, թե նրանք կկարողանա՞ն իրենց մասնակցությամբ նպաստել, որ այդ քաղաքականությունը լինի շատ ադեկվատ այն ակնկալիքներին, որոնք ձևավորվել են: Այս առումով ես մի քիչ ավելի հանգիստ եմ»:
Ինչ վերաբերում է մնացած նշանակումներին, ՀՀԿ-ական պատգամավորն ասաց, որ ինքնին երիտասարդ լինելը թերություն չէ, եթե իր մեջ ունի փորձառություն. «Բայց ես հիմա լսում եմ մեկնաբանություններ, հուսով եմ, որ նրանց կրթական ցենզը նրանց թույլ կտա կարճ ժամանակահատվածում սթափվել, որովհետև պետություն կառավարելը հեշտ գործ չի»,- ընդգծեց նա:
Ամբողջությամբ՝ տեսանյութում։
