Ընդդիմության առաջնորդների կոչով՝ Կիևի ցույցերի մասնակիցներն արգելափակել են իշխանության կենտրոնական մարմինները: Սակայն կիևցիները կարծում են, որ նախագահի վարչակազմի մոտ անցկացվող պիկետը զուտ դեկորատիվ է, քանի որ երկու այլ ելքերը չեն վերահսկվում:
Իշխանությունն օղակի մեջ վերցնելու և այն մինչև կառավարության հրաժարականը, խորհրդարանի ու նախագահի արտահերթ ընտրությունները պաշարման մեջ պահելու ընդդիմության կոչն արձագանք է գտել հարյուր հազարավոր ցուցարարների շարքում, ովքեր Անկախության հրապարակում էին հավաքվել դեկտեմբերի 3-ի երեկոյան: Այս մասին փոխանցում է DW-ն: Ընդդիմադիր առաջնորդների ղեկավարությամբ պիկետի են ենթարկվել ոչ միայն կառավարության, այլև նախագահի վարչակազմի շենքը:
Հաղորդվում է, որ մասնակիցների կարգախոսներն արմատականացել են, սակայն նրանց վարքագիծն ավելի խաղաղ բնույթ ստացել: Բարիկադների մոտ տեղակայված պահակներից մեկի խոսքով՝ իրենց խնդիրը ոչ թե գրոհելն ու զավթելն է, այլ իշխանության մարմինն արգելափակելը:
