Փաստաբան Հակոբ Ճարոյանը, հենվելով Սահմանադրության և օրենքների վրա, ուշագրավ վերլուծություն է իրականացրել ներքաղաքական զարգացումների մասով։ Մասնավորապես, թե ինչ է սպասվում առաջիկայում, ինչ հնարավորություններ է տալիս օրենքը լուծելու Հայաստանում առկա սահմանադրական ճգնաժամը։
Նրա խոսքով՝ Նիկոլ Փաշինյանը վարչապետ ընտրվելուց հետո տեսականում արտահերթ խորհրդարանական ընտրություններ և Ընտրական օրենսգրքի փոփոխություններ նախաձեռնել չի կարող, քանի որ ՀՀԿ-ն, ելնելով իր հետագա պլաններից և շահից, հավանություն կտա կառավարության ծրագրին, որի ընդունումից հետո արդեն ԱԺ-ն արձակելը և արտահերթ խորհրդարանական ընտրություններ անցկացնելը կբացառվի։
Ինչ վերաբերում է Ընտրական օրենսգրքի փոփոխությանը, ապա փաստաբանի խոսքով՝ դա էլ է քիչ հավանական, քանի որ Ընտրական օրենսգրքի փոփոխության մասով Սահմանադրության մեջ կան միմյանց հակասող երկու տարբերակ։ Կա Սահմանադրության 202 հոդվածը, որտեղ հստակ ամրագրված են նոր Սահմանադրություն ընդունելու կամ գործողը փոփոխելու հնարավորությունները։ Այդտեղ նշվում է, որ ԱԺ պատգամավորների 1/3-ի կամ կառավարության կամ ընտրական իրավունք ունեցող 200 հազար քաղաքացիների ստորագրությամբ հնարավոր է հրավիրել արտահերթ նիստ և քննարկել Ընտրական օրենսգրքի փոփոխությունները, որից հետո հարկավոր է ԱԺ մոտ 70 պատգամավորի ստորագրություն ԸՕ-ի փոփոխությունները հանրաքվեի դնելու համար։
«Ելնելով այն հանգամանքից, որ ՀՀԿ-ին ձեռնտու չեն լինելու ԸՕ-ի փոփոխությունները, ենթադրվում է, որ հնարավոր չի լինելու հավաքել 70 պատգամավորի ստորագրություն»,- ասաց Ճարոյանը։
Նրա խոսքով՝ մեկ այլ հնարավորություն էլ ընձեռվում է Սահմանադրության 103 հոդվածում, որտեղ նշված է, որ սահմանադրական օրենք հանդիսացող Ընտրական օրենսգիրքը փոփոխելու համար անհրաժեշտ է ԱԺ պատգամավորների 3/5-ի համաձայնությունը։ Այսինքն՝ այս դեպքում էլ մոտ 66 պատգամավորի համաձայնություն է պետք. «Այսինքն՝ Նիկոլ Փաշինյանի ընտրությունից հետո ո՛չ խորհրդարանական արտահերթ ընտրությունների, ո՛չ էլ ԸՕ-ի փոփոխությունների հնարավորություն չկա»։
Առավել մանրամասն՝ տեսանյությում:
