Հետհեղափոխական շրջանում, մանավանդ երբ կադրերի խիստ պակաս կա, պետք է հանգիստ մոտենալ ամեն ինչին և չակնկալել հրատապ լուծումներ: Այս մասին «Առաջին լրատվական»- ի հետ զրույցում ասաց քաղաքագետ Հայկ Մարտիրոսյանը՝ անդրադառնալով դիտարկմանը, որ ՀՀ ոստիկանապետի պաշտոնում Վ. Օսիպյանի նշանակում բավականին լուրջ քննարկումների առարկա է դարձել՝ հաշվի առնելով այն բռնությունները, որոնք ինչ-որ իմաստով նաև նրա առաջնորդությամբ են իրականացվել, մինչդեռ հեղափոխության նպատակները բոլորովին այլ են:
Քաղաքագետի բնորոշմամբ՝ Վ. Օսիպյանի նշանակումը ստրատեգիական քայլ է. «Պետք է հասկանալ հաշվարկը, իսկ հաշվարկը դեռևս հասկանալի չէ: Ամեն պարագայում փաստ է, որ ոստիկանապետը չէր կարող լինել դրսից, այլ պետք է լիներ համակարգից և պետք է լիներ ուսադիրներ կրող անձ: Ես չեմ կարծում, որ սա պատահական նշանակում է»: Հ. Մարտիրոսյանն ընդգծեց, որ պետք է նկատի ունենալ, որ գործ ունենք ժամանակավոր կառավարության հետ, և որ դեռևս շատ բան է փոխվելու:
Նրա խոսքով՝ Հայաստանի վարչապետն առաջին անգամ ունի արտաքին և ներքին լեգիտիմություն: «Այս օրինական, օրենքի տառին համապատասխան հեղափոխության պայմաններում ռադիկալ փոփոխությունները դառնում են ոչ կիրառելի, ժամանակ է պետք»:
Քաղաքագետի դիտարկմամբ՝ կան մարդիկ, որոնք նպաստում են առաջնորդի իշխանություն ստանալուն, և Ծառուկյանը հայտնվեց ճիշտ տեղում, ճիշտ ժամանակին: Հ. Մարտիրոսյանի կարծիքով՝ Գագիկ Ծառուկյանի մասնակցությունը կառավարությանը՝ նախարար կամ փոխվարչապետ նշանակվելը բացառված է, բայց «Բարգավաճ Հայաստանին անտեսելը կարող է հղի լինել քաղաքական վտանգներով»:
Հայկ Մարտիրոսյանի դիտարկմամբ՝ Հայաստանի իշխանությունը կոռումպացրել է նաև դասական Սփյուռքը: Նրա խոսքով՝ Սփյուռքի զգալի հատվածը կտրված է իրականությունից, և ով էլ իշխանություն լինի, սատարելու են, որովհետև իշխանասեր են, ոչ թե հայաստանասեր:
Քաղաքագետը, կարևորելով լրագրողների աշխատանքը, ընդգծեց, որ ստեղծվել է լրատվական հսկայական բարենպաստ, դրական դաշտ Հայաստանի շուրջ, և սա եզակի հնարավորություն է ոտքի կանգնելու մեջքը շտկելու, աշխարհին արժանապատիվ կերպով ներկայանալու: Նա հույս հայտնեց, որ այս հնարավորությունը կօգտագործվի:
Մանրամասները՝ տեսանյութում:
