Արդեն հստակ է, որ ընդդիմության առաջնորդ «Քաղաքացիական պայմանագիր» կուսակցության վարչության անդամ Նիկոլ Փաշինյանն է մայիսի 8-ին դառնալու վարչապետ։ Այս փաստից անհանգստացած մի շարք հանրապետական համայնքապետներ, նախկին քաղաքապետներ ու այլ պաշտոնատար անձինք հայտարարում են ՀՀԿ-ից դուրս գալու մասին։
Երեկ մենք գրել էինք Գեղարքունիքի նախկին փոխմարզպետի և նրա եղբոր՝ Վերին Գետաշեն համայնքի ղեկավարի մասին, ովքեր հայտարարել էին, որ դադարեցնում են իրենց անդամությունը ՀՀԿ-ին, քանի որ կուսակցությունը այլևս կապ չունի նժդեհյան գաղափարախոսության հետ, դավաճանել է իր սկզբունքներին։ Այդքանից հետո մնալ կուսակցությունում, ամոթ է։ Այսօր արդեն հայտնի դարձավ, որ ՀՀԿ-ից դուսր է եկել նաև Վարդենիսի նախկին քաղաքապետը։
«Առաջին լրատվական»-ը փորձեց ներկայումս գործող ՀՀԿ-ական մարզպետներից ու նախկին մարզպետներից հասկանալ՝ պահպանելո՞ւ են կուսակցական պատկանելիությունը, և շարունակելո՞ւ են արդյոք աշխատել իրենց պաշտոններում։
Տավուշի, Վայոց ձորի, Սյունիքի ՀՀԿ-ական մարզպետները խոր ընդհատակում էին, նրանց հետ կապվել ոչ մի կերպ չստացվեց։ Արմավիրի մարզպետ Աշոտ Ղահրամանյանը լսելով մեր հարցը՝ հայտարարեց, որ հանդիպման է և արագ անջատեց հեռախոսը։ Լոռու մարզպետ Արթուր Նալբանդյանը ևս շատ վրդովված հայտարարեց, որ զբաղված է և չի կարող խոսել․
Արագածոտնի նախկին մարզպետ, Սերժ Սարգսյանի մտերիմը համարվող Սարգիս Սահակյանը ևս չցանկացավ պատասխանել մեր հարցերին՝ հորդորելով, իրեն քաղաքական հարցերով չանհանգստացնել։ Մեր ճշտմանը, թե շարունակելու է մնալ Հանրապետական կուսակցության անդամ, Սահակյանը անջատեց հեռախոսը։ Ի դեպ, նրա հետ մեր կարճ հեռախոսազրույցի ողջ ընթացքում նրա սենյակից շատ բարձր լսվում էր Նիկոլ Փաշինյանի ձայնը։ Միացված էր նրա տեսաուղերձը քաղաքացիներին։
Ի տարբերություն մարզպետների, ՀՀԿ-ական քաղաքապետները, որոնց պաշտոնը ընտրովի է, հենվում էին ժողովրդի վրա։ Հրազդանի քաղաքապետ Արամ Դանիելյանը, օրինակ, մեր հարցը լսելուց հետո հայտարարեց, որ ինքը ընտրված քաղաքապետ է, և ժողովուրդն է իրեն ընտրել։
Մեր դիտարկմանը՝ շարունակելու է պահպանել կուսակցական պատկանելիությունը, Արամ Դանիելյանը պատասխանեց. «Ամեն ինչ լավ կլինի, դա թողեք հետո» և անջատեց հեռախոսը։
Միշտ հասանելի Մասիսի քաղաքապետ, Վովա Գասպարյանի թիկնազորի պետ Արշակ Հակոբյանի փեսան՝ Դավիթ Համբարձումյանը առհասարակ ռադիոծածկույթից դուրս էր։ Ի դեպ, նրա եղբայրը՝ Գոռ Համբարձումյանը մեղադրվում է ցույցերի առաջին օրը ցուցարարներին ծեծի ենթարկելու մեջ։ Սակայն առ այսօր Գոռ Համբարձումյանը չի հայտնաբերվել, և կատարվածին իրավական գնահատական չի տրվել։
Սպիտակի երկարակյաց ՀՀԿ-ական քաղաքապետ Գագիկ Սահակյանը մեզ հետ զրույցում ասաց, որ «ինքը հավատարիմ կմնա իր կուսակցությանը և չի դավաճանի ՀՀԿ-ին»։ «Ես կողմնակից եմ իմ կուսակցության գաղափարախոսությանը և չեմ կարծում, որ կուսակցությունը լքողները ճիշտ են վարվում»,- ասաց Սահակյանը։
Մեր դիտարկմանը, թե երեկ ՀՀԿ-ից դուրս եկած Գեղարքունիքի փոխմարզպետ Արտուշ Ղուկասյանը համարում էր, որ ՀՀԿ-ն վաղուց հեռացել է նժդեհյան քաղափարախոսությունից, Սահակյանը պատասխանեց. «Դա իր մասնավոր կարծիքն է, որը բոլորին վերագրելը ճիշտ չէ»,- ասաց քաղաքապետը։ Նա անդրադառնալով Նիկոլ Փաշինյանի վարչապետ դառնալու հնարավորությանը նկատեց, որ իրենք իրենց պատգամավորներին լիազորել են որոշումներ կայացնել։ Եթե որոշում է կայացվել պաշտպանել Փաշինյանին, ուրեմն դա է ճիշտը։
Երեկ Վանաձորում քաղաքացիները պահանջում էին մարզից ընտրված Վահրամ Բաղդասարյանին վայր դնել մանդատը, ստացվում է, որ ժողովուրդը այլևս չի վստահում այդ լիազորված պատգամավորներին, քաղաքապետը պատասխանեց. «Մեր մոտ էլ ցույցեր կային, նորմալ է։ Դա ոչինչ չի նշանակում։ Մենք տենց բաներին նորմալ ենք վերաբերում»։
