Ամբողջ Եվրամիությունը պետք է անմիջապես արձագանքի Ուկրաինայում տեղի ունեցող իրադարձություններին և այնտեղ ուղարկի իր դեսպաններին՝ փոխանցում է pravda.com.ua-ն: Այս մասին «Պոլսկոե ռադիո»-ում հայտարարել է Լեհաստանի ընդդիմության ղեկավար Յարոսլավ Կաչինսկին:
Նա ասել է, որ ինքը մեծ պատվիրակության հետ կմեկնի Կիև:
«Ուկրաինան այսօր խաչմերուկի վրա է»,- ասել է Կաչինսկին՝ ԵՄ անդամ բոլոր երկրներին կոչ անելով հանդես գալ Ուկրաինայում կատարվող իրադարձությունների նկատմամբ ընդհանուր դիրքորոշմամբ:
Նա նաև կոչ է արել, որ Լեհաստանի ԱԳՆ ղեկավար Ռադոսլավ Սիկորսկին և Շվեդիայի ԱԳՆ ղեկավար Կարլ Բիլդտը շտապ մեկնեն Կիև:
Նա Եվրախորհրդարանի առաքելության անդամներ Ալեքսանդր Կվասնևսկիին և Փեթ Քոքսին կոչ է արել չսպասել կիրակի օրվան, շաբաթ մեկնել Կիև:
Հայտնի է, որ շաբաթ օրը Լեհաստանի, Գերմանիայի և եվրոպական մի շարք այլ երկրների ԱԳՆ-ներ իրենց կանչել են Ուկրաինայի դեսպաններին՝ խաղաղ ցույցի դեմ ուժի կիրառման վերաբերյալ բացատրություն տալու:
ԱՄՆ-ը և Եվրոպայի շատ երկրներ քննադատել են Անկախության մայդանում ցույցի արյունալի ցրումը:
