Լեհաստանի վարչապետ Դոնալդ Տուսկը խստորեն դատապարտել է Ուկրաինայի ոստիկանության գործողությունները, որը կոպտորեն ցրել է Կիևի Անկախության մայդանի ցույցը՝ փոխանցում է pravda.com.ua-ն:
«Սա վրդովեցնում է, մանավանդ՝ ցուցարարները խաղաղ ակցիա էին անցկացնում»,- Լեհական ռադիոյի հաղորդմամբ՝ ասել է Տուսկը:
«Ես շատ լավ եմ հիշում նախագահ Յանուկովիչի խոսքերը, որն ասում էր՝ ուժ չի կիրառվի, Ուկրաինայում յուրաքանչյուրը, ով ցույց է անում առանց օրենքները խախտելու, կարող է իրեն անվտանգ զգալ: Հասարակական կարծիքը Լեհաստանում և աշխարհում չի ընդունի նման կոպիտ գործողությունները, մենք սա չենք հանդուրժի»:
«Մենք Ուկրաինայից բացատրություն կպահանջենք Լեհաստանի քաղաքացիներին ծեծելու գործով, որոնք մասնակցում էին Անկախության Մայդանի խաղաղ ցույցերին: Մենք թույլ չենք տա, որ մեր քաղաքացիները, եթե նրանք օրենքներ չենք խախտում, աշխարհի ցանկացած քաղաքում հետապնդվեն կամ ծեծվեն: Մենք համակ ուշադրությամբ հետևում ենք այս գործին և ուկրաինական կողմից բացատրությունների սպասում»,- ասել է Լեհաստանի կառավարության ղեկավարը:
Ինչպես հայտնի է՝ այսօր «Բերկուտը» ուժի կիրառմամբ ցուցարարներին ցրել է Անկախության մայդանից: 35 մարդ ձերբակալվել է:
Բժշկական օգնության է դիմել 35 մարդ, նրանցից 7-ը հոսպիտալացվել է: Ընդ որում՝ 2-ը Լեհաստանի քաղաքացիներ են:
Լեհաստանի ԱԳՆ-ը կանչել է Ուկրաինայի դեսպանին՝ բացատրություն տալու Կիևում տեղի ունեցող դեպքերի վերաբերյալ:
