Երևան քաղաքի Շիրակի փողոցում տեղի ունեցած ավտովթարի հետևանքով տուժած երեք հոգու վիճակը գնահատվում է միջին ծանրության, նաև երկու հոգի վրաերթի է ենթարկվել. նրանցից մեկը մահացել է տեղում, մյուսը` հիվանդանոցի ճանապարհին:
«Արմենպրես»–ի հետ զրույցում «Էրեբունի» բժշկական կենտրոնի վերակենդանացման բաժանմունքի վարիչ Արմեն Մուրադյանը տեղեկացրեց, որ տուժածներին այսօր կտեղափոխեն հիվանդասենյակներ:
«Երեք տուժածի վիճակն էլ այս պահի դրությամբ միջին ծանրության, կայուն է, և նրանց այսօր կտեղափոխենք հիվանդասենյակներ: 1977 թվականին ծնված Սամվել Սիմոնյանը ունի անրակոսկրի կոտրվածք, կրծքավանդակի սալջարդ, թոքերի թեթևակի սալջարդ, 1966 թվականին ծնված Մհեր Եփրեմյանը նույնպես նույն վնասվածքներն է ստացել, իսկ 1965 թվականին ծնված Արմեն Ղազարյանը ստացել է գլխուղեղի ցնցում: Վերջինս հնարավոր է այսօր դուրս գրվի»,- ասացին ԲԿ-ից:
Ապրիլի 24-ին ժամը 21:36-ին ստացվել է ահազանգ, որ Երևան քաղաքի Շիրակի փողոցում՝ Կենտրոնական զինվորական հավաքակայանի մոտակայքում, տեղի է ունեցել ՃՏՊ, կա տուժած. անհրաժեշտ է փրկարարների օգնությունը:
Դեպքի վայր է մեկնել ՀՀ ԱԻն ՓԾ հրշեջ-փրկարարական ջոկատից մեկ մարտական հաշվարկ:
Պարզվել է, որ Մ. Գ.-ն (ծնված 1959 թ.) «Mersedes C» մակնիշի ավտոմեքենայով վրաերթի է ենթարկել Գ. Ա.-ին և Ա.-ին (ազգանունը չի հաջողվել պարզել), այնուհետև բախվել է Կենտրոնական զինվորական հավաքակայանի սպասասրահի ճաղավանդակներին: Վրաերթի հետևանքով Գ. Ա.-ն մահացել է տեղում, իսկ Ա.-ն՝ «Էրեբունի» հիվանդանոց հոսպիտալացման ճանապարհին:
«Էրեբունի» ԲԿ-ից տեղեկություն է ստացվել, որ վարորդ Մ. Գ.-ն վնասվածքներով դիմել է ԲԿ: Բժիշկները տուժածի առողջական վիճակը գնահատել են բավարար:
