Խորապես մտահոգված եմ ծավալվող ներքաղաքական զարգացումներով: Անդառնալի կորուստներից խուսափելու նպատակով՝ կոչ եմ անում Ազգային ժողովի պատգամավոր Նիկոլ Փաշինյանին նստել քաղաքական երկխոսության և բանակցությունների սեղանի շուրջ: Դա պետք է անել անհապաղ` ասված է Սերժ Սարգսյանի` այսօր տարածված ուղերձում:
Սարգսյանի հայտարարությունը խիստ ուշագրավ է Նիկոլ Փաշինյանի կողմից երեկ հրապարակված «Ճանապարհային քարտեզի» համատեքստում, որի առաջին կետը վերաբերում էր գործող վարչապետի հրաժարականին: Փաշինյանը երեկ մի քանի անգամ արձանագրեց, որ պատրաստ է երկխոսության ոչ թե Սերժ Սարգսյանի հետ, այլ նրա հրաժարականի պայմանները քննարկելու օրակարգով:
Եվ ահա այս` ըստ էության, վերջնագրին հաջորդում է Սերժ Սարգսյանի` անհապաղ երկխոսություն սկսելու ուղերձը: Իհարկե, հեռու ենք այն մտայնությունից, որ Սերժ Սարգսյանը գլուխը կորցրել է Փաշինյանի երեկվա վերջնագրից և վերջինիս հրավիրում է զրույցի` իր հրաժարականի և անվտանգության հարցերն անհապաղ քննարկելու նպատակով: Նման վարքագիծը բացարձակապես հարիր չէ Սերժ Սարգսյանի մենթալիտետին, բացի այդ` համարժեք չէր լինի այն իրավիճակին, որ ստեղծվել է երկրում: Մի կողմից, Նիկոլ Փաշինյանի շարժման հեղափոխական ներուժը լատենտ է և այնքան էլ ակնհայտ չէ` սահմանափակվում է միայն փողոցային քաոս ստեղծելո՞վ, թե՞ ընդունակ է սրբել անգամ համակարգը: Ի վերջո` փողոց կամ կառավարական շենք շրջափակելը կարճաժամկետ էֆեկտ կունենա` որպես պայքարի տոխնոլոգիական նորարություն, սակայն չի կարող հանգեցնել որակական փոփոխությունների, եթե փողոցը չունի քաղաքական ուղերձ, ինստիտուցիոնալացվելու պոտենցիալ: Մյուս կողմից` իշխանություններն առայժմ փողոցային հուզումներին հետևել են՝ մեծ հաշվով, դիտորդի կարգավիճակով. օրական մի քանի տասնյակ քաղաքացու ոստիկանության բաժին բերման ենթարկելու գործողությունն ավելի շատ պրոֆիլակտիկ նշանակություն ունի: Չմոռանանք, որ Հայաստանի պատմության մեջ ավելի մասշտաբային ու զանգվածային շարժումներ կամ մաշեցրել են իրենց ռեսուրսը իշխանության հետ տևական պայքարում` չունենալով կենսունակ քաղաքական օրակարգ, կամ էլ` ճնշվել են համակարգի ռեպրեսիվ միջամտության հետևանքով:
Նիկոլ Փաշինյանը վճռական է տրամադրված, սակայն հեշտ հանձնվողներից չէ նաև Սերժ Սարգսյանը, որի պետական կամ քաղաքական կենսագրության մեջ քիչ չեն եղել ֆորս-մաժորային իրավիճակները:
Հրապարակային տեքստերը շատ հաճախ բազմաշերտ են և ամենևին էլ պարտադիր չէ դրանց ուղղակի, այսպես կոչված` բառացի մեկնությունը: Այնպիսի տպավորություն է, որ Սերժ Սարգսյանն առանձնապես չի հավատում ճգնաժամի քաղաքական հանգուցալուծմանը և տողատակում ակնարկում է ոչ թե անհապաղ երկխոսության, այլ էսկալացիայի շուտափույթ վերացման մասին:
Սարգսյանի հայտարարությունը բազմաշերտ նպատակներ է հետապնդում: Մի կողմից նա համակարգին ու հասարակությանը ցույց է տալիս, որ վերահսկում է իրավիճակը, մյուս կողմից` օգտագործում է միջազգային հանրության համար հաճո բառակազմ` իր համար ստեղծելով տոլերանտ առաջնորդի իմիջ:
Սերժ Սարգսյանի մարտավարությունը կառուցված է Նիկոլ Փաշինյանի իռացիոնալիզմի, մաքսիմալիզմի, դրանց հենքի վրա խարսխված վարքագծի, հնարավոր սխալների վրա: Սերժ Սարգսյանի ուղերձը` ռացիոնալ շեշտադրումներով և ձևակերպումներով, քողարկված վերջնագիր է, որը լեգիտիմացնելու է ուժային մարմինների կոշտ միջամտությունը, եթե Փաշինյանը մերժի առանց նախապայմանների երկխոսության հրավերը: Պատահական չէ, որ Սերժ Սարգսյանի ուղերձին զուգահեռ տարածվեց ոստիկանության հայտարարությունը` Նիկոլ Փաշինյանի կողմնակիցների հավաքը դադարեցնելու հաստատակամությամբ:
