Չնայած ժամանակ առաջ քաղաքական ուժերը` ՀՅԴ-ն և «Ժառանգությունը», հանդես եկան 100 տոկոս համամասնական ընտրակարգին և խորհրդարանական կառավարմանն անցնելու վերաբերյալ օրենսդրական նախաձեռնությամբ, որին միացան նաև ՀԱԿ-ն ու ԲՀԿ-ն, սակայն մինչ օրս քաղաքական որևէ ուժ նման առաջարկով չի դիմել Սահմանադրական բարեփոխումների հանձնաժողովին:
Հիշեցենք, որ նախորդ գումարման խորհրդարանը անցյալ տարի մերժեց 100 տոկոս համամասնական ընտրակարգին անցնելու վերաբերյալ այդ նախաձեռնությունը: Օրինագծին կողմ էր քվեարկել 30 պատգամավոր, որոնց թվում էին «Ժառանգության», ՀՅԴ-ի և մի քանի ԲՀԿ-ական պատգամավորներ: Օրինագծին դեմ էր ՀՀԿ-ն, որը հայտարարեց, թե խորհրդարանական կառավարմանն անցնելու հարց իրենց օրակարգում չկա:
ՀԱԿ պատգամավոր Գագիկ Ջհանգիրյանը երեկ «Առաջին լրատվական»-ի հետ զրույցում սահմանադրական փոփոխությունների վերաբերյալ ասաց. «Մենք էդպիսի հարց չենք քննարկել: Մեզ համար կարևորը գործող Սահմանադրության նորմերի կատարումն է, և ոչ օրը մեջ էդ Սահմանադրությունը բարեփոխելը»: Ինչո՞ւ ՀԱԿ-ը 100 տոկոս համամասնականի առաջարկ չի անում հարցին, Ջհանգիրյանը պատասխանեց. «Ես ասեցի, մենք էդ հարցը չենք քննարկել հիմա: Ես ավելի կարևորում եմ գործողի կատարումը»:
«Ժառանգությունը» ևս առաջարկ չի ներկայացրել Սահմանադրական փոփոխությունների հանձնաժողովին: «Մեզ որևէ մեկը առաջարկ չի արել` մասնակցելու քննարկումներին: Երբ առաջարկ կլինի, մենք մեր մոտեցումները Սահմանադրության վերաբերյալ կներկայացնենք»,- մեր հարցին ի պատասխան ասաց «Ժառանգության» փոխնախագահ Արմեն Մարտիրոսյանը` շարունակելով. «Իհարկե, արմատական փոփոխություն է պետք: Նախ` մեր Սահմանադրության մեջ մի քանի կարևորագույն խնդիրներ կան` ընդդիմությանը վերահսկողական լիազորություններով օժտելը, առաջին անհրաժեշտության ապրանքների մոնոպոլ կարգավիճակի վերացումը, բնականաբար` մենք հայտարարել ենք, որ կողմնակից ենք պառլամենտական կառավարմանը»: Ինչ վերաբերում է ՀՀԿ ներկայացրած առաջարկներին, ապա Արմեն Մարտիրոսյանի խոսքերով` ՀՀԿ առաջարկը տեխնիկական խնդիր է լուծում. «Կարծում եմ` սա իրենք անում են ընդամենը իրենց իշխանությունը երկարաձգելու մեխանիզմների կատարելագործման խնդիրը լուծելու համար»:
ՀՅԴ ԳՄ անդամ Արսեն Համբարձումյանը մեր հարցին` ինչո՞ւ ՀՅԴ-ն առաջարկ չի ներկայացրել Սահմանադրական փոփոխությունների հանձնաժողովին, պատասխանեց. «Որովհետև հիմա մասնագիտական հանձնաժողով է, որը պետք է գաղափարների, մոտեցումների, հայեցակարգային առաջարկությունների փաթեթ պատրաստի: Բնականաբար, ճիշտ ժամանակին, երբ որ մենք առիթ ունենանք ծանոթանալու և մեր առաջարկությունները ներկայացնելու հնարավորություն ունենանք, մենք կներկայացնենք»: Հետաքրքրվեցինք` այսինքն, ՀՀԿ-ն շտապե՞լ է, որ արդեն իսկ ներկայացրել է իր առաջարկները, Արսեն Համբարձումյանը, պարզվեց, տեղյակ չէ ՀՀԿ առաջարկների մասին: «Ես չգիտեմ` Հանրապետականը շտապել է, չի շտապել, ես ասում եմ, որ ժամանակ կա, և շտապելու որևէ խնդիր չունենք»: Նրա խոսքերով` եթե հանձնաժողովը հարկ համարի դիմել քաղաքական ուժերին, այդ ժամանակ իրենք իրենց առաջարկությունները կներկայացնեն:
ԲՀԿ-ն ևս ժամանակին միացել էր խորհրդարանական համակարգին անցնելու քաղաքական ուժերի նախաձեռնությանը: «Եթե ԲՀԿ կողմից որոշում լինի, կտեղեկացվեք, եթե գործողություն չի իրականացվում, չկա կամ քննարկում, կամ որոշում, կամ նպատակահարմարությունից ելնելով նախաձեռնությունը չի իրականացվում»,- մեր հարցին ի պատասխան ասաց ԲՀԿ մամուլի խոսնակ Տիգրան Ուրիխանյանը: Ասել է թե` ԲՀԿ-ն այլևս նպատակահարմար չի՞ համարում խորհրդարանական կառավարմանն անցումը, հարցրեցինք մենք: «Նպատակահարմար համարում է, ժամանակին միացել է, կողմ է եղել, որ հարցը մտնի օրակարգ: Ձեր տված հարցի վերաբերյալ քննարկում և որոշում չկա»,- պնդեց Ուրիխանյանը:
Ինչպես հայտնի է, ՀՀԿ-ն առաջարկել է փոփոխել Սահմանադրության 82-րդ և 104.1-րդ հոդվածները, որոնք վերաբերում են վարչատարածքային նոր բաժանումներին:
