Սիրիայի կառավարությունն ու ընդդիմադիր խմբավորումներն այն կարծիքին են, որ երկրում արդեն շուրջ երկու տարի շարունակվող զինված հակամարտությունը չի կարող կարգավորվել ռազմական ուղով: Այս մասին СNN-ին տված հարցազրույցում ասել է Սիրիայի հարցով ՄԱԿ-ի ու ԱՊԼ հատուկ ներկայացուցիչ Լախդար Բրահիմին:
«Որոշ ժամանակ առաջ երկու կողմերն էլ միանգամայն վստահ էին, որ հաղթելու են»,- ընդգծել է նա: Այժմ, Բրահիմիի խոսքով՝ երկու կողմերի ներկայացուցիչներն ասում են, որ այդ հակամարտությունը չի կարող կարգավորվել զինված ճանապարհով:
Հատուկ ներկայացուցիչը նշել է, որ սիրիական իշխանությունները հստակ համաձայնություն են տվել մասնակցելու հունվարի 22-ին ծրագրված «Ժնև 2» համաժողովին՝ առանց որևէ նախապայմանի:
«Ընդդիմությունը հաստատում է, որ նույնպես կմասնակցի, սակայն նրա ներկայացուցիչների մոտ առկա են հարցեր, մտավախություններ ու կասկածներ»,- նշել է Բրահիմին:
Նա ընդգծել է, որ մասնակիցներից ոչ մեկի առջև որևէ նախապայման չի դրվի, այդ համաժողովի ընթացքում չի պահանջվի նաև Սիրիայում մարտական գործողությունների դադարեցում:
Բրահիմին հիշեցրել է, որ Իրանի ներկայացուցիչները հետաքրքրվածություն են արտահայտել այդ հանդիպմանն առանց նախապայմանների մասնակցելու առնչությամբ և խոստացել են կառուցողական դեր խաղալ, եթե հրավիրվեն: Նա ընդգծել է, որ նման հանդիպումներին հրավիրում են ոչ թե սովորական դիտորդների, այլ նրանց, ովքեր ազդեցություն ունեն:
«Մերձավոր Արևելքում Իրանն ու Սաուդյան Արաբիան հանդիսանում են շատ ազդեցիկ պետություններ, ես կողջունեմ ցանկացած օգնություն, որը նրանք կկարողանան ցուցաբերել՝ ներկա գտնվելով համաժողովին, և որ ավելի կարևոր է՝ մասնակցելով գործընթացին, որը կսկսվի դրանից հետո»,- ասել է Բրահիմին:
