«Սա համազգային բողոքի ակցիա է. եթե ընդգրկում ունենա, և մասնակիցները կարողանան մնալ օրենքի շրջանակներում, իշխող ընկերակցությունը կարող է հակասություններից ճաք տալ»,- «Առաջին լրատվական»-ի հետ զրույցում ասաց քաղաքագետ Լևոն Շիրինյանը՝ հավելելով, որ իր համար զարմանալի է, որ առանց ընդդիմադիր կուսակցությունների ընդվզումը ստացվել է։
«Այո, ընդվզումը ստացվել է։ Տրանսպորտը չի աշխատում։ Հաջողություն կարող է լինել։ Հիմա կարևոր է, որ իշխանությունը հայտարարություններ անի, ասի, թե ինչ է նախատեսում, ինչ է ուզում, ինչպես է հաշվի նստելու ժողովրդի հետ»,- ասաց Շիրինյանը։
Քաղաքագետը նշեց՝ շատ կարևոր է, որ կոնսենսուս առաջանար, բայց դա տեղի չունեցավ, քանի որ Հայաստանում ընդդիմադիր կուսակցություններ չկան, «բոլորը սարքովի են»։
Լևոն Շիրինյանը նշեց, որ արդյունք հնարավոր է գրանցել, եթե կրիտիկական զանգված հավաքվի, իսկ դա հնարավոր կլինի, եթե այսօրվա հանրահավաքների կազմակերպիչները չգնան «Ղարաբաղ» կոմիտեի, ՀՀՇ-ի սիրած ճանապարհներով։ «Պետք է կենտրոնանալ Ազատության հրապարակում, շրջափակել և հարցը փակել»,- ասաց Շիրինյանը։
Առավել մանրամասն՝ տեսանյութում:
