Ռուսաստանը ճնշման տակ է գտնվում: Ռուբլին զգալիորեն կորցնում է արժեքը, ներդրողները դուրս են հանում իրենց գումարները, իսկ գները թանկանում են: Սակայն շվեյցարական Neue Zurcher-ի լրագրող Քրիստիան Շտայների կարծիքով ռուբլու անկումը կօգնի Ռուսաստանին:
«Կարծես թե Դոնալդ Թրամփի թվիթը սև երկուշաբթին կվերածի մի ողջ սև շաբաթի: Ամերիկյան կոպիտ պատժամիջոցների հետևանքները դեռ շոշափելի են ռուսական շուկայում, իսկ ԱՄՆ նախագահը լրացուցիչ յուղ է լցնում կրակի մեջ՝ սպառնալով հրթիռային հարվածով: Ռուբլին արդեն երեք օր շարունակ անկում է ապրում»,- գրում է լրագրողը:
Ռուբլու անկման հետևանքներն առաջին հերթին իրենց վրա կզգան սպառողները: Ռոսստատի տվյալներով՝ Ռուսաստանը ներկրում է ողջ սննդամթերքի գրեթե մեկ չորրորդ, իսկ այլ սպառողական մթերքների ավելի քան մեկ երրորդ մասը: Այս պարագայում ռուբլու թուլացումը նշանակում է, որ ներկրվող ապրանքների և ծառայությունների գները կաճեն, ինչը առաջին հերթին կանդրադառնա միջին խավի ներկայացուցիչների վրա, ովքեր հանդիսանում են ակտիվ սպառողներ և հաճախ են ճամփորդում՝ ասվում է հոդվածում:
