Հունաստանում ՀՀ դեսպան Ֆադեյ Չարչօղլյանը, ով այս օրերին Հայաստանում է, ըստ մամուլի հրապարակումների՝ առաջիկայում նշանակվելու է ՀՀ 4-րդ նախագահ Արմեն Սարգսյանի աշխատակազմի արարողակարգի բաժնի պետ:
Դեռ ամիսներ առաջ Հունաստանում ՀՀ դեսպանը հայտնվել էր մամուլի ուշադրության կենտրոնում։ Պատճառը դեսպանի՝ ՌԱԿ 96-ամյակին նվիրված հանդիսությանը ներկա չլինելու և տապալելու փորձն էր: Բանն այն է, որ Հունաստանի գլխավոր ընդդիմադիր ուժի՝ «Նեո-Դեմոկրատիա» կուսակցության անդամ, Աթենքի նախկին քաղաքապետ, նախկին արտգործնախարար Դորա Բակոյաննիսի՝ այս հանդիսությանը մասնակցությանը դեսպանը դեմ է եղել և նրան ադրբեջանամետ է անվանել: Դեսպանը հրաժարվել է մասնակցել միջոցառմանը՝ պատասխանելով, որ ռամկավարները Հայաստանի դեմ են. «Նա դեմ էր և վերջում էլ ասաց, որ մենք՝ ռամկավարներս, Հայաստանին դեմ ենք: Դժբախտաբար, նա ոչնչից տեղյակ չէ: Մենք համայնավարությանը դեմ էինք, բայց հայրենիքը սնանկ է ասելով՝ 70 տարի հայրենիքի կողքին էինք, պայքար էինք տանում հայրենիքի համար, բայց Դաշնակցությունը, որ 70 տարի գործեց Հայաստանի դեմ, հիմա այստեղի դեսպանը ուզում է նրանց հետ գործակցել: Իր գիտնալիքն է: Մինչդեռ ուզում եմ հիշեցնել, որ 46-ի ներգաղթը երբ կազմակերպվեց, մենք կազմակերպեցինք, Հունաստանից 19.721 հոգի եկան Հայաստան: Իսկ այսօր հազարներով մարդիկ լքում են Հայաստանը, և մարդիկ փոխանակ սրա մասին մտածեն, մեր՝ ռամկավարներիս դեմ են խոսում: Առաջին անձն է, որ ռամկավարների դեմ է խոսում»,- «Առաջին լրատվական»-ի հետ զրույցում մի մի քանի ամիս առաջ պատմել էր Հունաստանի Ռամկավար ազատական կուսակցության պատվո ատենապետ Սարգիս Խաչատրյանը:
Նա նաև նշել էր, որ դեսպանը հրաժարվել է ՌԱԿ-ի ցանկացած միջոցառմանը մասնակցելուց. «Ինձ ձեր ձեռնարկներին երբեք մի կանչեք, և ես էլ երբեք ու երբեք ձեզ դեսպանություն չեմ հրավիրի: Բացի այդ, դրանով դեսպանը չսահմանափակվեց, նա կրոնականներին՝ կաթոլիկ, ավետարանական, էջմիածնական, բոլորին հրահանգեց չգան մեր միջոցառմանը, և շատերը չեկան, բայց ժողովուրդը, փառք Աստծո, տեղ ու դադար չկար, մենք տոնեցինք, սրահը լեցուն էր»։
Անդրադառնալով Չարչօղլյանի՝ Հայաստանում պաշտոն ստանալուն՝ Սարգիս Խաչատրյանը նշեց, որ չեն կարող կարծիք հայտնել, իշխանություններն են որոշում՝ ով լինի դեսպան, և իրենք իրավունք չունեն խառնվելու։ Նա նշեց, որ ամիսներ առաջ ծագած խնդիրը լուծվել է, դեսպանը իր խոսքը հետ է վերցրել. «Ձեռք ձեռքի տվեցինք։ Հիմա խոսել ենք, կուսակցության ղեկավարության հետ հանդիպում է տեղի ունեցել, ամեն ինչ հարթվել է։ Ինքն իր ասածները ամբողջովին հետ առավ»,- ասաց նա։
Հայաստանում տեղի ունեցող գործընթացներն էլ չեն գնահատում, իրենց իրավունք չեն վերապահում հեռվից գնահատական տալու։
