ՄԱԿ-ի Գերագույն ասամբլեայի երրորդ կոմիտեն համացանցում էլեկտրոնային հսկողությունից պաշտպանվելու վերաբերյալ բանաձև է ընդունել: Փաստաթուղթը հաստատվել է միաձայն և կքննարկվի ԳԱ լիագումար նիստում:
Տեքստում նշված է, որ հաղորդագրություններին հետևելը, անձնական տվյալներ հավաքելը, հատկապես զանգվածաբար հետևելը, կարող են բացասական հետևանքներ ունենալ մարդու իրավունքների իրականացման ճանապարհին՝ փոխանցում է ITAR-TASS-ը:
Բանաձևը, որի ընդունումը նախաձեռնել են Բրազիլիան և Գերմանիան, ՄԱԿ-ի անդամ երկրներին կոչ է անում «հարգել և պաշտպանել անձնական կյանքի անձեռնմխելիության իրավունքները, այդ թվում՝ թվային հաղորդակցության կոնտեքստում, միջոցներ ձեռնարկել այս իրավունքների խախտումներին վերջ տալու և նման խախատումների կանխարգելման նպատակով պայմաններ ստեղծելու համար»:
