Բրազիլիայի նախկին նախագահ Լուիս Ինասիու Լուլա դա Սիլվան չի կատարել դատարանի կարգադրությունը և չի ներկայացել ոստիկանություն։ Այս մասին հաղորդում է Associated Press-ը։
Դա Սիլվան պետք է հանձնվեր իշխանություններին տեղի ժամանակով ժամը 17:00-ին, Կուրիտիբա քաղաքում։ Սակայն գործակալության տվյալներով, նա իր կողմնակիցների հետ միասին դեռևս գտնվում է Սան–Պաուլուի՝ Սան–Բերնարդու–դու–Կամպու քաղաքում։
Ավելի վաղ Բրազիլիայի Գերագույն դատարանը դա Սիլվային ձերբակալելու օրդեր էր տվել։ Նա ինքը դատարանի որոշումը անհեթեթություն է անվանել։
Դատարանը նախկին նախագահին 12 տարվա ազատազրկման է դատապարտել կոռուպցիայի համար։ Հետաքննության տվյալներով՝ դա Սիլվան և իր կինը 748 հազար դոլար են ստացել OAS շինարարական ընկերությունից՝ անօրինական սխեմայի արդյունքում, որ կապված է եղել Petrobras պետական նավթային ընկերության հետ։
