Սիդնեյի, Քվինսլենդի համալսարանների գիտնականներին հաջողվել է հատուկ տեխնոլոգիաների միջոցով արագացնել գյուղատնտեսական մշակաբույսերի աճը՝ գրում է aspekty.net-ը:
Դա թույլ է տվել բույսերի մեկ սերնդի կյանքը կրճատել մինչև 8 շաբաթ և տարեկան 6 անգամ բերք ստանալ՝ երեք անգամ սովորականից շատ: Գիտնականները բույսերն աճեցրել են 22-ժամյա լուսավորվածությամբ և խոնավությունն ու ջերմաստիճանը կարգավորող հաղորդակներով կահավորված հատուկ ջերմոցներում: Առայժմ նրանց հաջողվել է կարճ ժամանակամիջոցում աճեցնել որոշ մշակաբույսեր՝ հացահատիկ, գարի, լոբի և ոլոռ:
Մասնագետների կարծիքով՝ բույսերի արագ աճեցումը չափազանց կարևոր է՝ պայմանավորված ներկայում մոլորակի բնակչության աճով և որոշ անկյուններում մթերքի անբավարար պաշարով: Նոր տեխնոլոգիաներով ստացված մշակաբույսերը շուկայում կհայտնվեն մոտ 10 տարի հետո:
