Իտալիայի նախկին վարչապետ Սիլվիո Բեռլուսկոնին իտալական պետական Radio Uno Rai ռադիոյի ուղիղ եթերում Սենատում առաջիկայում կայանալիք քվեարկությունը, որի ժամանակ պետք է վճռվի նրան սենատորի լիազորություններից զրկելու հարցը, անվանել է պետական հեղաշրջման փորձ:
Իտալիայի Գերագույն վճռաբեկ դատարանը օգոստոսի 1-ին հաստատել էր ավելի վաղ Բեռլուսկոնիի դեմ Վերաքննիչ դատարանի կողմից նրա Mediaset խմբի ֆինանսական խարդախությունների աղմկալի գործով սահմանված դատավճիռը: Քաղաքական գործիչը դատապարտվել էր 4 տարվա ազատազրկման: Ազատազրկման ժամկետը, սակայն, մեխանիկորեն կրճատվել է՝ հասցվելով մեկ տարվա՝ կապված 2006 թվականից գործող ներման մասին օրենքի հետ:
Անցած շաբաթ իր կողմնակիցների առջև ելույթ ունենալիս Բեռլուսկոնին հայտարարել էր, որ ներման մասին հայց չի ներկայացնի, սակայն միաժամանակ Իտալիայի նախագահ Ջորջո Նապոլիտանոյին կոչ էր արել իրեն ներելու մասին որոշում ընդունել: Ի պատասխան՝ պետության ղեկավարի մամլո ծառայությունը հայտնել է, որ այդ գործին նախագահի միջամտության համար չկան պայմաններ:
Սենատում քվեարկությունը տեղի կունենա նոյեմբերի 27-ին: Այդ առիթով նախկին վարչապետի կողմնակիցները մտադիր են Հռոմում անցկացնել բողոքի ցույց:
«Դա պետական հեղաշրջում է, որը բխում է հանցավոր քաղաքական դատավճռից՝ ուղղված աջ կենտրոնամետ ուժերի վերացմանն ու ճանապարհները ձախերի համար բացելուն»,- նշել է նախկին վարչապետը:
Նա կրկին հայտնել է իր լիարժեք անմեղության մասին և հավելել, որ մտադիր է այսօր ինչ-որ նոր փաստաթղթեր հրապարակել՝ կապված Mediaset-ի սկանդալային գործի հետ: Նրա խոսքով՝ առկա են փաստեր ու ականատեսների ցուցմունքներ, որոնք ժամանակին ուշադրության չեն արժանացել դատական մարմինների կողմից:
