«Actio popularis: Ուրիշ ոչինչ։ Այս գործը միայն ու միայն Լեռնային Ղարաբաղի հարցը հերթական անգամ հանրայնացնելու նպատակ է հետապնդում»,- «Առաջին լրատվական»-ի հետ զրույցում ասաց իրավաբան, միջազգային իրավունքի մասնագետ Արա Ղազարյանը՝ անդրադառնալով Ադրբեջանի Գլխավոր դատախազության կողմից հարուցված քրեական գործին։
Նշենք, որ Ադրբեջանի Գլխավոր դատախազությունը մարտի 31-ին քրեական գործ է հարուցել հայաստանյան մի շարք ընկերությունների դեմ՝ Լեռնային Ղարաբաղի տարածքում և հարակից շրջաններում գտնվող ոսկու և մի շարք այլ թանկարժեք մետաղներ պարունակող հանքերը անօրինականորեն շահագործելու մեղադրանքով: «Թուրան» գործակալության տեղեկություններով՝ ադրբեջանական դատախազության հետաքննության թիրախում են հայտնվել Vallex Group, Base Metal, ACP և մի շարք այլ ընկերություններ, ինչպես նաև մի շարք ֆիզիկական անձինք: Քրեական գործը հարուցվել է երկու հոդվածներով՝ անօրինական ձեռնարկատիրական գործունեության ծավալում և Ադրբեջանի սահմանի անօրինական հատում։
«Այս քրեական գործը ոչ թե անօրինական գործողությունների դեմ պայքարի նպատակ է հետապնդում, այլ նպատակ կա քաղաքականացնելու Լեռնային Ղարաբաղի սուվերենության հարցը։ Իսկ եթե իրավաբանորեն նայենք հարցին, ապա Ադրբեջանը չունի գործադիր, դատական կամ օրենսդիր իշխանություն Լեռնային Ղարաբաղի վրա: Ձևական իմաստով իրենք դա հայտարարում են, բայց իրավիճակային իմաստով այնտեղ Ադրբեջանի օրենքները չեն գործում։ Եթե Արցախում Ադրբեջանի օրենքները չեն գործում, Ադրբեջանը չունի գործադիր իշխանություն այդ տարածքում, նշանակում է, որ Ադրբեջանի օրենքները չեն կարող այնտեղ խախտվել։ Այն մարդիկ, ովքեր ապրում, աշխատում և գործունեություն են ծավալում, նրանք Ադրբեջանի որևէ օրենք չեն խախտում և չեն կարող խախտել»,-ընդգծեց Արա Ղազարյանը։
Նա զուգահեռ անցկացրեց Ադրբեջանի նախագահ Իհլամ Ալիևի այն հայտարարության հետ, որում ասում էր, թե Լեռնային Ղարաբաղում գտնվող ցանկացած ֆիզիկական անձ, այդ թվում նաև՝ քաղաքացիական անձինք զուտ այնտեղ գտնվելու փաստի ուժով լեգիտիմ թիրախ են, որպեսզի մենք իրենց նկատմամբ զենքի կիրառենք. «Սա խելահեղ հայտարարություն էր, անմիտ հայտարարություն էր։ Եվ հիմա ես զուգահեռ եմ անցկացնում, որովհետև էլի հիմքերը նույնն են։ Եթե Ադրբեջանի օրենքները Լեռնային Ղարաբաղում չեն գործում, դա նշանակում է, որ այնտեղ չեն էլ կարող խախտվել Ադրբեջանի օրենքները։ Եվ հետո, Ադրբեջանի քրեական հետապնդման մարմինները չեն կարող ասել, որ հետապնդում են որևէ իրավաչափ նպատակ, օրինակ՝ պայքարում են հանցավորության դեմ կամ պայքարում են երկրի ընդերքը անօրինական օգտագործեու դեմ, այն դեպքում, երբ դրանից հանրային շահը չի տուժում, որովհետև, կրկնում եմ, Լեռնային Ղարաբաղում չեն գործում Ադրբեջանի օրենքները։ Այս քրեական գործը իրավական առումով ոչ մի նշանակություն չունի։ Ադրբեջանը որևէ շանս չունի այս մասով»։
Լուսանկարը՝ Photolure-ի
