Եվրամիության հետ Ասոցացման համաձայնագրի նախապատրաստումը դադարեցնելու Ուկրաինայի որոշումը դարձավ Ռուսաստանի նախագահ Վլադիմիր Պուտինի հաղթանակը՝ թելադրված պատժամիջոցներ սահմանելու Ռուսաստանի սպառնալիքներով, որոնք կաթվածահար կանեին առևտուրն Ուկրաինայի հետ: Այս մասին գրում է The New York Times-ը:
Պուտինը լուրջ ջանքեր է գործադրել Ուկրաինայի ծրագրերը խափանելու համար, որոնք նա գնահատել է որպես լուրջ սպառնալիք, արևելքում ՆԱՏՕ-ի ընդլայնմամբ ռազմական հզորությունն ամրապնդելու Արևմուտքի փորձերի տնտեսական տարբերակ: Սեպտեմբերին Ռուսաստանի կողմից համանման ճնշման ենթարկվեց նաև Հայաստանը, որը ևս հրաժարվեց ԵՄ-ի հետ բանակցություններից՝ գրում է թերթը:
Սա հիասթափություն է ոչ միայն ԵՄ-ի, այլ նաև Ուկրաինայի ժողովրդի համար՝ մեջբերում է թերթը ԵՄ-ի արտաքին քաղաքականության և անվտանգության հարցերով գերագույն հանձնակատար Քեթրին Էշթոնի խոսքերը: Էշթոնի խոսքերով՝ Ուկրաինան կանգնած է աճող տնտեսական ճգնաժամի նախաշեմին, զգալի օգնության կարիք ունի և ֆինանսական լուրջ կորուստներ կկրի:
