ԱՄՆ-ը անհանգստացած է, որ Վենեսուելայի ազգային անսամբլեան այդ հարավամերիկյան հանրապետության նախագահ Նիկոլաս Մադուրոյին հատուկ օրենսդրական լիազորություններով է «օժտել»: Այս մասին հաղորդում է ITAR-TASS-ը` վկայակոչելով ԱՄՆ Պետդեպարտամենտի մամլո ծառայության ղեկավար Ջեն Փսաքիին:
«Մենք անհանգստացած ենք, որ Վենեսուելայի ազգային անսամբլեան 12 ամսով հատուկ օրենսդրական լիազորություններ է շնորհել նախագահ Նիկոլաս Մադուրոյին»,- հայտարարել է նա:
Վաշինգտոնում կարծում են, որ «ժողովրդավարական կառավարման կառույցները պետք է իրենց ընձեռված դերը կատարեն: Եվ մենք ենթադրում ենք, որ լիազորությունների բաժանումը և իշխանությունների անկախ ճյուղերի առկայությունը ժողովրդավարության անքակտելի տարրերն են»,- ընդգծել է դիվանագետը:
Իր հերթին, Վենեսուելայի նախագահ Նիկոլաս Մադուրոն արդեն հինգշաբթի օրը կստորագրի առաջին 2 օրենքները` խորհրդարանից արտակարգ օրենսդրական լիազորություններ ստանալուց հետո:
«Հինգշաբթի օրը ես ստորագրում եմ առաջին 2 օրենքները` վաճառականների համար գների և ամբողջական ռեեստրի մասին, իսկ շաբաթ-կիրակի օրերին ամբողջ երկրին կոչ եմ անում մասնակցել փոքր և միջին առևտրականների նոր գրանցմանը»,- հայտարարել է Մադուրոն:
