Գերմանիայի արտաքին գործերի նախարար Զիգմար Գաբրիելն իր թուրք գործընկեր Մևլութ Չավուշօղլուի հետ Բեռլինի մոտակայքում գտնվող «Բորժիգ» դիվանագիտական առանձնատանը հանդիպման ժամանակ հայտարարել է, որ Թուրքիայի և Գերմանիայի հարաբերություններում առաջընթաց է նկատվում, կան մի շարք ձևաչափեր, որոնք Բեռլինը կրկին ցանկանում է գործարկել:
«Մենք օգտագործում ենք այս հնարավորությունը՝ մեր երկկողմ հարաբերությունները քննարկելու համար: Վերջին շաբաթների և ամիսների ընթացքում մենք առաջընթաց ենք գրանցել. ունենք մի շարք բանակցային ձևաչափեր, որոնք ցանկանում ենք հիմա փորձարկել»,- ասել է Գաբրիելը:
Նախարարն ավելացրել է, որ Գերմանիան ներկայումս աշխատում է նոր կառավարության ձևավորման վրա, ինչը նույնպես կարող է դրական ազդեցություն ունենալ հարաբերությունները հարթելու գործում:
Իր հերթին Մևլութ Չավուշօղլուն նշել է, որ Սոչիում, Աստանայում և Ժնևում ընթացող գործողությունների մասնակիցների ջանքերը նպատակաուղղված են սիրիական հակամարտության քաղաքական լուծման որոնմանը: Միևնույն ժամանակ, Թուրքիայի ԱԳ նախարարը պնդում է, որ Արևելյան Ղուտայում «ռեժիմի կողմից նկատվում են ՄԱԿ-ի Անվտանգության խորհրդի բանաձևի խախտումներ»:
