18 մարդու մահվան պատճառ դարձած ավտովթարի մասնակից, Հայաստանի քաղաքացի Հրաչյա Հարությունյանի փաստաբանը Մոսկվայի Տվերի դատարան բողոք է ներկայացրել ընդդեմ քննիչի, ով իր պաշտպանյալին դատարան է բերել խալաթով:
«Մեղադրյալին կնոջ խալաթով և ծովափնյա ոտնամաններով դատարան տանելը, իմ կարծիքով, խախտում է կալանավորներին պահելու մասին օրենքը»,- Life News-ին հաղորդել է վարորդի փաստաբան Ռուբեն Մարգարյանը:
Նա պարզաբանել է, որ Հարությունյանը խնդրել է քննիչին կապ հաստատել իր ազգականների հետ, որպեսզի նրանք իր համար հագուստ բերեն, բայց դա չի արվել:
«Ստացվում է, որ քննիչը ոչնչի համար պատասխանատու չէ՞: Եթե մերկ ձերբակալեր, ուրեմն մերկ կբերեր և կհանձներ բանտին: Մենք խնդրում ենք դատարանին քննիչի գործողություններն ապօրինի ճանաչել»,- ասել է փաստաբանը:
Մարգարյանը հույս ունի, որ դատարանը վերջակետ կդնի Հարությունյանի խալաթի պատմությանը, քանի որ դատախազությանն ու քննչական մարմիններին ներկայացված բողոքները ոչ մի արդյունք չեն տվել: