Փետրվարի 25-27-ը Բեռլին էր մեկնել ՀՀ ԱԺ արտաքին հարաբերությունների մշտական հանձնաժողովի նախագահ և հայ-գերմանական բարեկամության խմբի ղեկավար Արմեն Աշոտյանի գլխավորած պատվիրակությունը, որի կազմում էր նաև ՀՀ ԱԺ պատգամավոր Մանե Թանդիլյանը («Ելք» խմբակցություն)` մասնակցելու ս.թ. փետրվարի 27-ին գերմանական Ֆրիդրիխ Էբերտ հիմնադրամի, Գերմանահայկական ընկերակցության, Գերմանիայի տնտեսության Արևելյան հանձնաժողովի և Գերմանիայում Հայաստանի դեսպանության հետ համատեղ կազմակերպված 1-օրյա հատուկ քննարկմանը` նվիրված ՀՀ-ԵՄ Համապարփակ և ընդլայնված գործընկերության համաձայնագրին:
Նշյալ միջոցառման բանախոսներն էին ԳԴՀ Բունդեսթագի պատգամավոր, Արտաքին հարաբերությունների մշտական հանձնա-ժողովի անդամ Նիլս Շմիդթը (ՍԴԿ), Գերմանիայի տնտեսության Արևելյան հանձնաժողովի գործադիր տնօրեն Միխայել Հարմսը, «Հայաստանի եվրոպացի բարեկամներ» կազմակերպության նախագահ Դիոգո Պինտոն, ինչպես նաև, ԳԴՀ ԱԳՆ քաղաքական տնօրենի տեղակալ, Արևելյան Եվրոպայի, Հարավային Կովկասի և Կենտրոնական Ասիայի հարցերով հատուկ հանձնակատար Անդրեաս Պեշկեն: Միջոցառմանը ներկա էին ԳԴՀ-ում հավատարմագրված դիվանագիտական ներկայացուցչությունների ղեկավարներ, ԳԴՀ Բունդեսթագի պատգամավորներ, գիտահետազոտական կառույցների փորձագետներ և քաղաքական հիմնադրամների ներկայացուցիչներ:
Քննարկման ընթացքում կողմերն անդրադարձել են ՀՀ-ԵՄ Համապարփակ և ընդլայնված համաձայնագրին, դրա շրջանակներում երկկողմ համագործակցության հեռանկարներին և ակնկալիքներին:
Այցի շրջանակներում Ա. Աշոտյանի գլխավորած պատվիրակությունն ունեցել է մի շարք հանդիպումներ ԳԴՀ ԱԳՆ պաշտոնյաների, Բունդեսթագի հանձնաժողովների նախագահների և պատգամավորների հետ, որոնց ընթացքում քննարկվել են ՀՀ-ԳԴՀ միջխորհրդարանական համագործակցության ու ՀՀ-ԵՄ փոխգործակցության հեռանկարները:
