ԱԺ «Ելք» խմբակցության պատգամավոր Արամ Սարգսյանը գտնում է, որ այսօր ԱԺ նիստում «Ելքի» առաջարկած Մարտի 1-2 իրադարձությունների վերաբերյալ հայտարարության նախագծին կողմ քվեարկելու ՀՀԿ-ի որոշման համար կա 2 դրդապատճառ: Այսօր ԱԺ-ում լրագրողների հետ զրույցում նա նշեց, որ առաջինն այն է, որ ՀՀԿ-ն ասում է, որ այդ հարցն իրենց համար նույնչափ կարևոր է, և չեն վախենում հարցը քննարկել, երկրորդը` ՀՀԿ-ականները միտումնավոր սլաքներն ուղղում են նախկին նախագահ Ռոբերտ Քոչարյանի վրա:
«Պատահական չէ, որ իմ համար հարցերի հարցն այն է, թե այդ գիշեր ով հրաման տվեց մտնել Ազատության հրապարակ, որովհետև նաև ողջ միջազգային հանրությունն արձանագրեց, որ ոչ համաչափ ուժ է կիրառվել, և այդ գիշերով հրապարակ մտնելու կարիքը բացարձակ չկար, որովհետև ամսի 26-ից հետո գործընթացները գնում էին մարման, և դա ակնհայտ էր թե՛ ազգային անվտանգությանը, թե՛ ներքին գործերին, թե՛ Սերժ Սարգսյանին, և թե՛ Ռոբերտ Քոչարյանին: Եվ արդյոք այստեղ քաղաքական միտում կա՞ր»,- ասաց Ա.Սարգսյանը:
