«Առաջին հայացքից տեսականորեն այս օրենքը նորմալ է, հատկապես եթե հաշվի առնենք այն, որ շատ զարգացած երկրներ ունեն այդպիսի օրենք կամ նմանատիպ դրույթ, սակայն այլ հարց է, թե որքանով են դրանք գործնականում կիրառվում։Կարելի է ասել, որ արտերկրում այդ դրույթը գրեթե չի կիրառվում, այնտեղ դրա կարիքը չկա, իսկ մեր իրականության մեջ այսպիսի օրենքն առանց այն էլ որոշակիորեն կաշկանդված փաստաբանին ավելի կկաշկանդի», -«Առաջին լրատվական»-ի հետ զրույցում նշեց «Անկախ դատավոր» ՀԿ նախագահ Պարգև Օհանյանը` խոսելով այն օրինագծերի մասին, համաձայն որի դատարանի կողմից փաստաբանների նկատմամբ կարող են սանկցիաներ ու մինչև 100 հազար դրամ տուգանք կիրառվել։
Պարգև Օհանյանի կարծիքով` սա վտանգավոր օրենք է, որի կիրառման արդյունքում նրա խոսքերով ` ունենալու ենք շղթայակապ փաստաբաններ։ Անդրադառնալով նաև Փաստաբանների պալատի կողմից կազմակերպված մեկօրյա գործադուլին, որը պետք է նաև շարունակական լիներ, սակայն ՓՊ-ի նախաձեռնող խմբի կողմից հայտարարվեց գործադուլի դադարեցման մասին, Պարգև Օհանյանը նկատեց. «Ընդհանրապես գործադուլներին ես վատ եմ վերաբերում, իսկ կոնկրետ փաստաբանների արածը ես գործադուլ չեմ համարում, այլ դրանք ուղղակի փոքրիկ ակցիաներ են, որով փաստաբաններն ուզում են ուշադրություն հրավիրել. չասեմ ճարահատյալ, բայց սա նրանց կողմից ստիպված քայլ է»։
Մանրամասները` տեսանյութում։
