ԱՄՆ-ում շունը չորս հրազենային վնասվածք է ստացել տիրոջը կողոպտիչներից պաշտպանելու ընթացքում: Այդ մասին տեղեկացնում է K5 News-ը:
Դեպքը տեղի է ունեցել ամերիկյան Դե Մոյն քաղաքում: Ինչպես պատմել է հերոս շուն Ռեքսի տերը՝ 16-ամյա Խավիեր Մերկադոն, այդ օրը նա գտնվել է իր տան երկրորդ հարկում, երբ հանկարծ լսել է, թե ինչպես անծանոթ մեքենան կանգնել է տան բակում, իսկ ներքևում ջարդվել է պատուհանը:
Երիտասարդը թաքնվել է պահարանում և միանգամից ոստիկանություն է կանչել, իսկ Ռեքսը վազել է ներքև և հարձակվել կողոպտիչների վրա:
««Շունը կծեց ինձ, վերցրու նրան». նրանք սկսեցին պատասխան հարվածներ տալ Ռեքսին»,- պատմել է Մերկադոն:
Երբ հանցագործները հասան սենյակին, որում թաքնված էր Մերկադոն, շունը նորից հարձակվեց նրանց վրա: Դա ջղայնացրեց կողոպտիչներին և նրանք չորս անգամ կրակեցին շան վրա: Այնուհետև լսելով ոստիկանական ազդանշանները կողոպտիչները փախել են: Նրանք մինչ այժմ չեն հայտնաբերվել:
Վախեցած երիտասարդը պահարանում նստել է մոտ մեկ ժամ՝ ամբողջովին համոզված, որ իր շունը սատկել է:
Սակայն Ռեքսը կարողացել է կենդանի մնալ: Նրան հիվանդանոց են հասցրել վզի և թաթերի հրազենային վնասվածքներով: Շանը բարդ վիրահատություն է անհրաժեշտ եղել, ինչի համար Խավիերի մորաքույրը գումար հավաքելու հայտարարություն է տարածել համացանցում:
