Ազգային ժողովի ԲՀԿ խմբակցության պատգամավոր Էլինար Վարդանյանը նոյեմբերի 15-ին ԱԺ ճեպազրույցների ժամանակ անդրադարձավ ԲՀԿ-ական պատգամավոր Տիգրան Ուրիխանյանի հարցին վարչապետի տված պատասխանին: Նա նշեց, որ այդպիսի արհամարհական պատասխանը ենթադրում է նույնատիպ վերաբերմունք հասարակության նկատմամբ, որովհետև բարձրացված խնդիրն իրականում հասարակությանը հուզող խնդիր է:
«Մենք բոլորս գիտենք, թե ինչպիսի վիճակում են գտնվում այսօր մարզերում բազմաթիվ կենսական նշանակություն ունեցող հաստատություններ, մինչդեռ բյուջեով ավելի առաջնային է համարվել վարչական շենքերի ֆասադների վերանորոգումը: Ես, անկեղծ ասած, որպես ոչ ընդունելի վարքագիծ եմ դա համարում Կառավարության կողմից ԱԺ պատգամավորի հանդեպ և միևնույն ժամանակ, կրկնում եմ, նման արհամարհանքով արտահայտվում է Կառավարության վերաբերմունքը հասարակությանը հուզող հարցերի նկատմամբ»,- ասաց նա:
Նշենք, որ ի պատասխան Ուրիխանյանի հարցի՝ արդյոք բյուջեում գումարների բաշխման վերանայում չի՞ սպասվում՝ շենքերի ֆասադներին ուղղված միջոցները դրանց կարիքը զգացող մանկապարտեզներին հատկացնելու առումով, վարչապետն ասել էր. «Ավարտեցի՞ք: Ոչ»:
