«Հըզբոլլահ» շարժման առաջնորդ Հասան Նասրալլահը նախազգուշացրել է, որ եթե ԱՄՆ-ը և Իսրայելը Իրանի հետ համաձայնության չգան Թեհրանի միջուկային ծրագրի հարցում, տարածաշրջանում կառաջանա պատերազմի վտանգ, հաղորդում է ITAR-TASS-ը:
«Ի՞նչն է այլընտրանք Իրանի և աշխարհի երկրների միջև համաձայնագրին: Այլընտրանքը պատերազմն է տարածաշրջանում»,- ասել է Նասրալլահը իր տեսաուղերձում, որը հրապարակվել է համացանցում:
«Հըզբոլլահ» շարժման ղեկավարը քննադատել է Իսրայելի և արաբական որոշ պետությունների ղեկավարությանը, որոնք հարում են Իսրայելին իրանական միջուկային ծրագրի հարցում:
«Իսրայելին պետք չէ որևէ համաձայնագիր, որը կարող է կանխել պատերազմը տարածաշրջանում: Շատ ցավալի է, որ արաբական որոշ երկրներ զբաղեցրել են Իսրայելի տեղը»,- նշել է Նասրալլահը և հավելել, որ Իսրայելի վարչապետ Բենիամին Նեթանյահուն դարձել է որոշ արաբական պետությունների դիրքորոշումների արտահայտողը:
Նասրալլահի խոսքով՝ այդ երկրները խոչընդոտում են ցանկացած քաղաքական լուծման, որն ուղղված է Սիրիայում արյունահեղության դադարեցմանը:
«Մենք երկու դաշնակից ունենք՝ Իրան և Սիրիա, և վստահ ենք այդ միության մեջ»,- ընդգծել է Նասրալլահը:
Դիտորդները կարծում են, որ այս մեղադրանքներն ուղղված են Կատարի և Սաուդյան Արաբիայի դեմ, որոնք աջակցում են սիրիական ընդդիմությանը, այն դեպքում, երբ Իրանը և «Հըզբոլլահը» աջակցում են Սիրիայի գործող իշխանություններին:
