Հայտնի դերասան Վարդան Պետրոսյանի հետ կատարված դեպքը ի ցույց դրեց մեր օրենսդրության բացերն ու թերությունները: Այսօր տեղի ունեցած մամուլի ասուլիսի ժամանակ այս մասին ասաց «Ազգային թատերական ստեղծագործական միավորման» նախագահ Արա Խզմալյանը՝ զարմանքով նշելով, որ միայն երեկ է իմացել՝ Հայաստանում տնային կալանքը, որպես խափանման միջոց, օրենքով նախատեսված չէ:
«Վիրավորական է, երբ մարդուն՝ չիմանալով մեղավոր է, թե անմեղ, միանգամից կալանավորում են: Կարելի է ավելի մարդասիրական քայլերի դիմել: Մենք գործ ունենք իրավագիտակցության բացակայության հետ: Բանը բանից անցել է, դրա համար էլ մարդիկ այլևս չեն կարողանում համբերել: Անկատար օրենքների պատճառով մարդիկ իրավապահ մարմինների ձեռքին դառնում են խաղալիք»,- ասաց նա:
Ասուլիսի մյուս բանախոս՝ երգահան Մարիետա Բադալյանն իր հերթին նկատեց, որ Վարդան Պետրոսյանին հապշտապ կալանելը ուղիղ կապ ունի նրա թատերական գործունեության հետ: «Նա իր սատիրայի շրջանակներում հաճախ տրորել է ոմանց «մազոլները», դրա համար էլ հիմա իր հետ այսպես են վարվում: Վարդան Պետրոսյանը հասարակական հիվանդությունները «բուժող» բժիշկ է, հիվանդություններ, որոնց մասին մենք հաճախ չենք էլ բարձրաձայնում: Ճիշտ է՝ երկու երեխաներ են մահացել, բայց մարդուն, ախր, չի կարելի ոտնակոխ անել»,- ասաց նա:
Արա Խզմալյանի խոսքով՝ անթույլատրելի է, որ Վարդան Պետրոսյանի կալանքի միջոցը փոփոխելու համար կազմակերպված ստորագրահավաքին մինչ այժմ չեն միացել ՀՀ վաստակավոր և ժողովրդական որոշ գործիչներ:
«Ժառանգություն» կուսակցության գլխավոր քարտուղար Ստեփան Սաֆարյանն էլ նկատեց, որ հայտնի մարդու վաստակն ու ճանաչվածությունը, բնական է, պետք է բերեն հասարակական մոբիլիզացիայի: «Վարդան Պետրոսյանին պաշտպանողները, իհարկե, չեն անտեսում տուժած մյուս կողմին: Միաժամանակ՝ այս ողբերգական ավտովթարի մեջ մեղավոր փնտրելու իրավունք չունենք՝ հարգելով նրանցից յուրաքանչյուրի անմեղության կանխավարկածը: Հոգուս չեմ ուզում մեղք անել, բայց ուզում եմ ասել, որ մեկը հետևողականորեն ուզում է վատություն անել դերասանին: Հասարակությունը պետք է հետևողական լինի, քանի որ տպավորություն է, որ մեր արդարադատությունը սայթաքածին, սխալ թույլ տվողին ավելի տապալելու միտում ունի»,- ասաց նա՝ հավելելով, որ ցավը Վարդան Պետրոսյանին ուղեկցելու է ողջ կյանքում:
Ստյոպա Սաֆարյանի տեղեկացմամբ՝ Վարդան Պետրոսյանի խափանման միջոցը փոփոխելու պահանջով կազմակերպված ստորագրահավաքին մասնակցել է շուրջ 3 հազար քաղաքացի: «Այդ ստորագրությունները հանձնվել են դերասանի փաստաբանին: Ինչ վերաբերում է մտավորականության ստորագրահավաքին, ապա այնտեղ մոտ 80 մարդու ստորագրություն է»,- ասաց «Ժառանգություն» կուսակցության քարտուղարը:
Հիշեցնենք, որ նոյեմբերի 9-ին Կոտայքի մարզի ընդհանուր իրավասության դատարանը բավարարել էր ոստիկանության ներկայացրած միջնորդությունը՝ հայտնի դերասան Վարդան Պետրոսյանին կալանավորելու վերաբերյալ:
Հիշեցնենք նաև, որ հոկտեմբերի 20-ին Եղվարդ-Երևան ճանապարհի 2-րդ կմ-ին դերասան Վարդան Պետրոսյանի վարած «ԲՄՎ-320» և «ՎԱԶ-2121» մակնիշի մեքենաների բախման հետևանքով մահվան ելքով վթար էր տեղի ունեցել:
Վթարի հետևանքով դերասան Վարդան Պետրոսյանը տեղափոխվել էր «Էրեբունի» բժշկական կենտրոն: Բացի Պետրոսյանից, վթարի հետևանքով ծանր վնասվածքներով հիվանդանոցներ էր տեղափոխվել ևս 6 մարդ. «Վազ 2121» մակնիշի մեքենայի ուղևորներից հորեղբոր որդիներ Էդգար և Էդուարդ Հակոբյանները մահացել էին:
Դեպքի առթիվ հարուցվել էր քրեական գործ՝ ՀՀ Քրեական օրենսգրքի 242-րդ հոդվածի 3-րդ մասի հատկանիշներով՝ «Ավտոմեքենա կամ մեխանիկական այլ տրանսպորտային միջոց վարող անձի կողմից ճանապարհային երթևեկության կամ տրանսպորտային միջոցների շահագործման կանոնները խախտելը որն անզգուշությամբ առաջացրել է երկու կամ ավելի մարդու մահ»:
Նախաքննական մարմինը որոշում էր կայացրել ձերբակալել Վարդան Պետրոսյանին:
