Կլիմայի փոփոխությունն ազդում է այնպիսի արևադարձային փոթորիկների աճող հզորության վրա, ինչպիսին էր «Հայան» թայֆունը, որը մեծ ավերածությունների ու հազարավոր զոհերի պատճառ է դարձել Ֆիլիպիններում: Այս մասին հայտարարել են Համաշխարհային օդերևութաբանական կազմակերպության գիտնականները:
Մասնագետները նշում են, որ չնայած չի կարելի գլոբալ տաքացմանը «մեղադրել» կոնկրետ փոթորկի հարցում, Ֆիլիպիններին պատուհասած թայֆունը վերջին շրջանում հաճախակիացած բնական աղետների մի ողջ շարքից միայն մեկն էր: Այս մասին հայտնում է BBC-ն:
Բացի այդ, կազմակերպության ներկայացուցիչների խոսքով՝ ծովի մակարդակի բարձրացման պատճառով առափնյա շրջանների բնակիչներն ավել խոցելի են դարձել փոթորիկների համար:
Համաշխարհային բանկի նախագահը BBC-ին հայտնել է, որ վտանգավորության 5-րդ աստիճանի թայֆունները, ինչպիսին «Հայանն» էր, սովորաբար հայտնվում են մի քանի տասնամյակը մեկ, սակայն սա արդեն երկրորդ նման թայֆունն է, որը հարվածում է տարածաշրջանին մեկ ամսվա ընթացքում:
Մասնագետները հայտարարել են նաև, որ նոյեմբերի սկզբի տվյալներով՝ 2013-ին արևադարձային ցիկլոնների թիվը հասել է 86-ի և գրեթե մոտեցել 1987-2010 թվականների միջին ցուցանիշին (89 դեպք): Փոթորիկների սեզոնին միջինից բարձր ակտիվություն է նկատվել Խաղաղ օվկիանոսի հյուսիս-արևելքում:
