«Ելք» դաշինքի անդամ, նախկին վարչապետ Արամ Սարգսյանը ուրախ է, որ Նիկոլ Փաշինյանը պատրաստ է առաջադրվել որպես վարչապետի թեկնածու։ Նրա խոսքերով՝ նման գործընթացներին համաձայնություն տալը և գնալը իրենք ավելի շատ համարում են ինքնազոհություն, և հաճույքով մեկը մյուսին զիջում են։
«Որևէ մեկս որևէ մեկի տեղի վրա աչք չունենք, ինչն իշխանական շրջանակներում հիմնական բանավեճերի աղբյուր է դառնում, մեր մոտ առողջ բանավեճ է, տեսակետների առողջ բախում, որը ընդհանրության մեջ բերում է ճիշտ լուծումների, և այդ առումով շատ ուրախ եմ, որ նա չի բացառել իր թեկնածության առաջադրումը»,- շեշտեց Արամ Սարգսյանը։
Անդրադառնալով դիտարկմանը, որ ապրիլյան սպասվող իրադարձությունների՝ Սերժ Սարգսյանի հաջորդ ղեկավարման դեմ պայքարելու վերաբերյալ «Ելք»-ում տարբեր տեսակետներ են․ Նիկոլ Փաշինյանը խոսում է պայքարի մասին, իսկ Էդմոն Մարուքյանն արդեն ուշ է համարում, Արամ Սարգսյանն ասաց․
«Նախ ասեմ՝ էս հարցով ոչ թե տարաձայնություն է, այլ առողջ բանավեճ, ու ես դա շատ լավ եմ համարում, որ դաշինքում կա տեսակետների, մոտեցումների տարբերություն։ Ասեմ ավելին՝ Էդմոն Մարուքյանը նման տեսակետ ասելով, չի բացառել, որ եթե հանրային պահանջարկ լինի և հանրությունը փողոց դուրս գա, «Ելք» դաշինքը պատրաստ է այդ պահանջին տեր կանգնել»,- ընդգծեց նա։
Արամ Սարգսյանը հորդորեց վստահ լինել, որ դաշինքը չի քանդվի։
Մանրամասները՝ տեսանյութում։
