Տիբեթում վանականն ինքնահրկիզվել է՝ ի նշան Չինաստանի իշխանությունների դեմ բողոքի՝ պահանջելով Տիբեթի հոգևոր առաջնորդ Դալայ-լամայի վերադարձը: Այս մասին հայտնում է Radio Free Asia-ն՝ հղում կատարելով սեփական աղբյուրներին: Նշվում է, որ 20-ամյա Ցերինգ Գյալը բողոքի ակցիան անցկացել է նոյեմբերի 11-ի երեկոյան, Բեմա գավառում:
Չինաստանի ոստիկանությունը հանգցրել է կրակն ու նրան տեղափոխել մոտակա հիվանդանոց: Որոշ տեղեկություններով՝ նա ողջ է, սակայն ծանր այրվածքներ է ստացել:
Ինքնահրկիզման դեպքից հետո շուրջ 200 մարդ էր հավաքվել նրա վանքի մոտ՝ ի նշան զորակցության: Այնուհետև նրանք ուղևորել են հիվանդանոց և պահանջել նրան դուրս գրել: Նրանք մտավախություն ունեին, որ վանականի հետ իշխանությունները կարող են վարվել ոչ պատշաճ կերպով, ինչպես նման քայլի դիմած նախորդ վանականների հետ: Ցուցարարներից ոչ մեկին ներս չեն թողել:
Գյալի ակցիան համընկել է Չինաստանի կոմկուսի հերթական փակ լիագումար նիստի անցկացման հետ:
Ընդհանուր առմամբ 2009 թվականից ի վեր ինքնահրկիզման է դիմել ավելի քան 120 տիբեթցի վանական:
