Ձմեռային սեզոնի կամ աշուն-գարնանային սեզոնի հիվանդությունները հիմնականում վարակիչ հիվանդություններ են, որոնց թվին են պատկանում օդակաթիլային եղանակով փոխանցվող գրիպը, ջրծաղիկը:
Բազմաթիվ վիրուսներից ամենածանրը գրիպն է, որը կարող է առաջացնել համաճարակներ: Այս հիվանդությունների տարածմանը հիմնականում նպաստում են փակ, չօդափոխվող տարածքներում մարդկանց կուտակումները: Լրագրողների հետ հանդիպմանը տեղեկացրեց ՀՀ առողջապահության նախարարության հիվանդությունների վերահսկման և կանխարգելման ազգային կենտրոնի մասնագետ Լիլիթ Ավետիսյանը՝ անդրադառնալով սուր շնչառական վիրուսների, այդ թվում՝ գրիպի ներկայիս իրավիճակին:
«Գրիպի սեզոնը սկսվել է: Մարդիկ պետք է միջոցառումներ ձեռնարկեն այն կանխելու ուղղությամբ: Եթե մարդը հիվանդ է, անպայման պետք է բժիշկ հրավիրի ու չզբաղվի ինքնաբուժմամբ».- նշեց բանախոսը՝ խորհուրդ տալով չզբաղվել ինքնաբուժմամբ ու չընդունել հակաբիոտիկներ:
Լիլիթ Ավետիսյանը, խոսելով գրիպի դեպքերի մասին, նշեց, որ ՀՀ առողջապահության նախարարությունը անցկացնում է ամենշաբաթյա մոնիթորինգներ, և դրանց հիման վրա կազմված վիճակագրությունը ցույց է տալիս, որ այս պահին չկա գրիպի համաճարակ, և որ արտառոց ոչինչ չի կատարվում: «Անգամ նվազում կա նախորդ շաբաթների համեմատ: Այս պահին անհանգստացնող ոչինչ չկա, սակայն ոչ մի երկիր ապահովագրված չէ համաճարակներից:
Վերջին շաբաթվա տվյալների համաձայն՝ գրիպով հիվանդների թիվը հասնում է 2000-ի, սակայն իրավիճակը սուր-շնչառական հիվանդությունների առումով հանգիստ է»,- ասաց նա:
Հարցին ի պատասխան՝ ի՞նչ անել գրիպով չվարակվելու համար, բանախոսը խորհուրդ տվեց սուր-շնչառական հիվանդություններից խուսափելու նպատակով պահպանել անձնական հիգիենան՝ հաճախ լվանալ ձեռքերը, քանի որ դրանք ամենաշատն են շփվում վիրուսի հետ:
Եթե, այնուամենայնիվ, տանը հիվանդ կա, ապա բժիշկը խորհուրդ տվեց հիվանդի բուժումը վստահել միայն մեկ մարդու, որը հիվանդի հետ շփվելիս պետք է դիմակ կրի, որպեսզի չվարակվի: Բժիշկը խորհուրդ տվեց այս սեզոնին իմունիտետի բարձրացման նպատակով սնվել մրգերով, բանջարեղենով, ուտել վիտամին C պարունակող սննդամթերք, օգտագործել ընկույզ, մեղր:
Լիլիթ Ավետիսյանը խորհուրդ տվեց նաև, այնուամենայնիվ, հիվանդանալուց խուսափելու համար հանգնվել եղանակին համապատասխան, իսկ հիվանդներին հորգորեց տանը մնալ՝ մինչև վերջնական ապաքինում:
