2018-ի ապրիլին Սերժ Սարգսյանի պաշտոնաթողության և նոր վարչապետի նշանակման հարցը շարունակում է Հայաստանում լինել կանխագուշակությունների, վերլուծությունների առարկա: Ընդ որում՝ բոլորը համոզված են, որ Սերժ Սարգսյանի վարչապետությունը վճռված է, սակայն չեն ասում ժամանակից շուտ, որ հանրությունն ու քաղաքական ուժերը չհասցնեն դրա դեմ քայլեր նախաձեռնել:
Փաստորեն կա խորհրդարանի ընտրությանը հաղթած կուսակցություն, որն ունի բացարձակ մեծամասնություն, սակայն այդ կուսակցությունը պատասխան չունի վարչապետի հարցում: Հիմնական «կամ-կամ»-ը, կարծես թե, Սերժ Սարգսյան-Կարեն Կարապետյան տիրույթում է, և ըստ այդմ էլ՝ կա մի բավականին կոնկրետ հարց: Կառավարության պաշտոնական հրաժարականին, այսինքն՝ Սերժ Սարգսյանի նախագահության ավարտին մնացել է 2․5 ամիս: Եթե Կարեն Կարապետյանը չի մնում, ապա ի՞նչ հիմնավորմամբ է Հանրապետական կուսակցությունը հրաժարվում նրան առաջադրել, և վերջապես ի՞նչ հիմնավորմամբ է առաջադրվում Սերժ Սարգսյանը։ Հենց այս տիրությում են փորձագետները քննարկում Անվտանգության խորհրդի կազմի վերջին փոփոխությունները՝ առաջին փոխվարչապետի պաշտոնն ու կառավարության նիստերը դռնփակ անցկացնելու օրենքի նախագիծը։ Կառավարության նիստերի հեռարձակումը հանգեցնում է նրան, որ այդ նիստերը դառնում են ձևական, և որևէ նախարար չի գնում որևէ թեմայով բանավեճի: Մոտավորապես այդպես է բացատրում նիստերը դռնփակ անելու օրենսդրական նախաձեռնությունն արդարադատության նախարար Դավիթ Հարությունյանը, ի պատասխան հանրության դժգոհության: Տպավորություն է սակայն, որ ամեն ինչ հարմարեցված է կոնկրետ անձանց համար, միևնույն ժամանակ, ապրիլին ընդառաջ շատերը չեն բացառում ֆորս- մաժորները։ Թեման «Առաջին լրատվական»-ի տաղավարում քննարկելու ենք քաղաքագետ Սուրեն Զոլյանի հետ։
