Իրանն Ատոմային էներգիայի միջազգային կազմակերպության հետ ձեռք բերած համաձայնագրի շրջանակում կազմակերպությանը կփոխանցի տվյալներ միջուկային օբյեկտների մասին, մասնավորապես հետազոտական ռեակտորների, որոնք ծրագրում են կառուցել երկրում: Այս մասին հայտնում է Reuters գործակալությունը՝ հղում անելով միջազգային գերատեսչության հայտարարությանը:
Ավելի վաղ հաղորդվել է, որ պայմանավորվածությունները նախատեսում են ԱԷՄԳ-ի տեսուչների այց Արաք քաղաքի օբյեկտ, որտեղ տեղակայված է միջուկային ծանրջրային ռեակտոր, ինչպես նաև երկրի հարավային Գաչին բնակավայրի ուրանային հանքավայր: Փարչինի ռազմաբազայում տեսչական այցի հնարավորության մասին չի հաղորդվում: Այնտեղ, ԱԷՄԳ-ի կարծիքով, միջուկային օբյեկտ է տեղակայված:
Ներկայում Թեհրանում է գտնվում ԱԷՄԳ-ի ղեկավար Յուկիա Ամանոն: Այն փաստը, որ ԱԷՄԳ-ի պատվիրակությունը Ամանոն է գլխավորում, վերլուծաբանների կողմից դրական է գնահատվում:
Հիշեցնենք՝ երեկ Ժնևում կայացել է «Վեցյակի» և Իրանի ներկայացուցիչների հանդիպումը, որն ավարտվել է առանց սպասելի համաձայնագրի, սակայն կողմերը հասկացրել են, որ առաջընթացի են հասել:
