Հայաստանի օլիմպիական պատվիրակությունը երեկ մեկել է Հարավային Կորեայի Փյոնչհան քաղաք, որտեղ փետրվարի 9-ին կմեկնարկեն 23-րդ ձմեռային Օլիմպիական խաղերը: Ձմեռային մարզաձևերի կարևորագույն փառատոնին Հայաստանը կներկայացնեն դահուկորդներ Միքայել Միքայելյանը, Կատյա Գալստյանը և լեռնադահուկորդ Աշոտ Կարապետյանը: Մրացավայր մեկնելուց առաջ «Հանրային հեռուստաընկերության» թղթակցի հետ զրույցում Գալստյանն ու Միքայելյանը ասացին, որ ՀԱՕԿ-ը նույնիսկ նորմալ մարզահագուստ չի տրամադրել:
Մասնավորապես, Միքայելյանը ցույցադրելով ամառային կիսաթև շապիկներ և շորտեր, հայտարարեց, որ ստացել է ամառային օլիմպիական խաղերից մնացած հավաքածուն է: «Հագուստը ոչ միայն ամառային օլիմպիական խաղերից մնացածն է այլև մեծ է»,- ասել էր դահուկորդը: ՀԱՕԿ-ից «Առաջին լրատվական»-ին հայտնեցին, որ մեր օլիմպիականները ստացել են ձմեռային եղանակին համապատասխան լիարժեք հավաքածու, իսկ կիսաթև շապիկն ու շորտերը հյուրանոցներում և փակ հաստատություններում կրելու համար են նախատեսված: Իսկ թե ինչու են հայ օլիմպիականները ցուցադրել հենց ամառային մարզահագուստները, այնքան էլ ընկալելի չէ: Մեր երեք օլիմպիականները նշեցին, որ Փյոնչհան են մեկնում ոչ թե մեդալներ նվաճելու, այլ հաղթանակ տանելու համար: Օրինակ Գալստյանն ասաց, որ լավագույն հիսունյակում տեղ ունենալը մեծ հաջողություն կլինի:
Նշենք, որ ձմեռային օլիմպիական խաղերում հայաստանցի մարզիկները երբևէ մեդալ չեն նվաճել: Մրցանակային տեղերից վերջին 25 տարիներին անմասն են մնացել նաև հարևան բոլոր երկրների մարզիկները, ասել է թե ձմեռային մարզաձերը մեր տարածաշրջանի համար չեն: Ամեն դեպքում հաջողություն ենք մաղթում մեր օլիմպիականներին մեկնարկելիք խաղերում:
