Ազգային ժողովի «Հայ ազգային կոնգրես» խմբակցության ղեկավար Լևոն Զուրաբյանը նոյեմբերի 11-ի նիստում ԱԺ նախագահ Հովիկ Աբրահամյանի ուշադրությունը հրավիրեց իրավապահ մարմինների պահվածքին, ովքեր խոչընդոտում են օրենքով սահմանված պատգամավորների մուտքը Քրեակատարողական հիմնարկներ։ Զուրաբյանը հիշեցրեց՝ ԱԺ պատգամավորների գործունեության կարևոր երաշխիքներից մեկն այն է, որ օրենքով նրանց տրված են հնարավորություններ՝ հանդիպելու պետական պաշտոնյաների հետ, այցելելու ձերբակալվածներին, կալանավորվածներին և այլն:
«Այս մի քանի օրվա ընթացքում արձանագրվել են դեպքեր, երբ կոնկրետ պատգամավորներին թույլ չեն տվել այցելել ձերբակալվածներին, կամ պետական պաշտոնյան չի հանդիպել պատգամավորին։ Նիկոլ Փաշինյանին թույլ չեն տվել այցելել Շանթ Հարությունյանին, ինձ նույնպես թույլ չեն տվել: Արաբկիրի ոստիկանապետը՝ Ամիրխանյան Գրիշան, չի հանդիպել՝ հակառակ նրան, որ հավաստիացումներ տվեց, թե դա կանի՝ համաձայն օրենքի»,-ասաց նա։
Նշենք, որ ՀԱԿ խմբակցության պատգամավոր Նիկոլ Փաշինյանը ևս արդեն քանիցս բարձրաձայնում է այն մասին, որ իրեն թույլ չեն տալիս տեսակցել կալանավորված հեղափոխական Շանթ Հարությունյանի հետ: Զուրաբյանի դժգոհությունն է առաջացրել նաև բարձրաստիճան ոստիկանների պահվածքը. չեն հանդիպում պատգամավորների հետ, պատշաճ բացատրություններ չեն տալիս այս կամ այն դեպքի առիթով, մինչդեռ օրենքը պատգամավորներին հնարավորություն տալիս է:
ՀԱԿ պատգամավորին հետաքրքրում էր՝ ի՞նչ կարող է անել ԱԺ նախագահն այս պարագայում: Հակառակ այն հանգամանքին, որ հնչեցված հարցն օրակարգային չէր, ԱԺ նախագահ Հովիկ Աբրահամյանը նշեց, որ պատգամավորը մանրամասն ներկայացնի հարցը, խոստացավ զրուցել գերատեսչության ղեկավարի հետ, որ պարզաբանի՝ ինչո՞ւ չեն հանդիպել, եթե օրենքը սահմանում էր:
«Ազգային ժողովն ամեն ինչ կարող է անել, մենք ամեն ինչ կարող ենք անել, որ օրենքը պահպանվի: Ես առաջարկում եմ Ձեզ ավելի մանրամասն ներկայացնել, և ես գերատեսչությունների ղեկավարների հետ անձամբ կխոսեմ և կփորձեմ ճշտել, թե ինչու չեն հանդիպել, եթե օրենքը դա պարտադրում է»,- ասաց նա։
