«Ներման ինստիտուտում այս փոփոխություններով նախագահը միայն ունենալու է ստորագրելու իրավասություն»,- «Առաջին լրատվական»-ի հետ զրույցում ասաց «Ելք» խմբակցության պատգամավոր Արտակ Զեյնալյանը՝ հավելելով, որ այս օրենքով ֆիկցիա է դառնում Սահմանադրության մեջ գրվածը, թե՝ նախագահը երկրի գլուխն է և ներում է շնորհում:
Նրա խոսքով՝ այս օրենքով նախագահը ներում չի շնորհելու, այլ ստորագրելու է վարչապետի կողմից շնորհված ներումը, այսինքն՝ նախագահը իրականում զրկվում է ներում շնորհելու իրավասությունից:
«Այս ինստիտուտը շատ է ֆորմալիզացվել, վերածվել է խրախուսանքի ինստիտուտի, խրախուսական ակտի, այնինչ սա պիտի լինի հումանիստական ակտ. ներելու համար կարող է լինել ներման խնդրանք, կարող է և չլինել, կարող է միջնորդություն ներկայացնել երրորդ անձը՝ ինչպես մարդկային հարաբերություններում»:
Արտակ Զեյնալյանի կարծիքով՝ արվող փոփոխություններով շեղվել են Սահմանադրության ոգուց, էլ ուր մնաց՝ տառից շեղված չլինեն. «Ես հանգում եմ այն համոզման, որ ամբողջությամբ այս սահմանադրական ծիսակատարությունը արվել է այն բանի համար, որպեսզի հիմնավորվի Սերժ Սարգսյանի՝ նախագահ մնալու ցանկությունը՝ վարչապետ անվանումով, և ազատվի վերընտրվելու սահմանափակումից»:
Մանրամասները՝ տեսանյութում: