Քիչ առաջ Արարատ քաղաքի թիվ 18 ընտրատարածքի 5-րդ ընտրատեղամասում իր քվեարկությունը կատարեց Արարատի քաղաքապետի ԲՀԿ-ական թեկնածու Սամվել Բարսեղյանը: Քվեարկությունն ավարտելուց անմիջապես հետո նա նշեց, որ քվեարկել է ավելի լավ Արարատի համար:
«Առաջին լրատվական»-ին հաջողվեց զրուցել ԲՀԿ-ական թեկնածուի հետ: Սամվել Բարսեղյանը նշեց, որ տվյալներ չունի և չի կարող ասել՝ քվեարկությունը իր համար հուսադրո՞ղ է, թե՞ ոչ: Նա նշեց, որ ուրախալի է, որ Արարատի մարզում ընտրությունների ակտիվ մասնակցություն է գրանցվել: Հարցին, թե իր հաղթանակը ԲՀԿ-ի համար պատվի և արժանապատվության հա՞րց է, և կարևո՞ր է հաղթանակը, քաղաքապետի թեկնածուն փորձեց շրջանցել՝ ասելով, որ իր տրամադրությունը լավ է, և ամեն ինչ լավ է լինելու:
Նշենք, որ Արարատում քաղաքապետի պաշտոնի համար մրցում են ԲՀԿ-ից Սամվել Բարսեղյանը, որն աշխատում է «Արարատցեմենտ» գործարանում՝ որպես արտադրության պետ, և ՀՀԿ-ից՝ Հայկ Հայկյանը:
