Դերասանուհի Ջենիֆեր Լոուրենսը հարցազրույց է տվել «Քաղցած խաղեր. և կբռնկվի կրակը» նոր ֆիլմի շրջագայության շրջանակներում:
23-ամյա դերասանուհու հասցեին ուղղված հարցերի թվում շոշափվել է գեղեցկության հոլիվուդյան չափանիշների թեման, քանի որ Ջենիֆերը դրանց կատաղի հակառակորդն է: Նա հայտարարել է, որ իրեն բազմիցս են խորհուրդ տվել ազատվել ավելորդ քաշից՝ կանխագուշակելով կինոկարիերայի ավարտ, եթե նա շարունակի այդքան «գեր» մնալ:
«Եվ ի՞նչ եք առաջարկում: Ամեն օր սոված մնալ, որպեսզի երջանի՞կ դարձնեմ ուրիշներին: Դա ուղղակի հիմարություն է»,- ասել է Լոուրենսը:
«Մենք պետք է դադարենք միմյանց այդպես վերաբերվել ու իրար գեր անվանել»:
Վերջերս երկար մազերից հրաժարված Ջենիֆերը ընդունել է, որ ցանկանում է ճիշտ մոդել լինել իր երկրպագուների համար:
«Ես չեմ ուզում, որ իմ Քիթնիս հերոսուհուն դիտող երիտասարդ աղջիկները ասեն. «Ես ուզում եմ այսպիսին լինել, այդ պատճառով կհրաժարվեմ ընթրիքից»: Ես այդ գաղափարը գլխումս էի պահում դերակատարման համար մարզվելիս և ցանկանում էի ուժեղ և բարեկազմ տեսք ունենալ, ոչ թե նիհար և հյուծված»,- ասել է նա:
