Ազգերի լիգայի խաղարկության վիճակահանությունից հետո Հայաստանի և Ադրբեջանի հավաքականների՝ միմյանց հետ մրցելու հավանականությունը էլ ավելի մեծացավ: Այս երկրների հավաքականները իրական հնարավորություն ունեն հաղթահարելու խմբային փուլի արգելքը և պայքարը շարունակելու փլեյ-օֆում:
D դիվիզոնի 4 ենթախմբերի հաղթողները 2019 թվականին կիսաեզրափակիչ և եզրափակիչ մրցակարգով վիճարկելու են 2020 թվականի Եվրոպայի առաջնության եզրափակիչ փուլի ուղեգիրը: Հիշեցնենք, որ Հայաստանը ընդգրկվել է D դիվիզիոնի 4-րդ ենթախմբում Մակեդոնիայի, Լիխտենշտեյնի և Ջիբրալթարի հավաքականների հետ միասին: Ադրբեջանցիներին բաժին են հասել Կոսովոյի, Մալթայի և Ֆարերյան կղզիների հավաքականները:
«Գաբալայի» և Ադրբեջանի հավաքականի կիսապաշտպան Ջավիդ Հուսեյնովը նախորդ շաբաթ խոսելով Հայաստանի հավաքականի հետ հնարավոր հանդիպման մասին՝ աղմկահարույց հայտարարությամբ էր հանդես եկել: «Դեռ վաղ է այդ մասին խոսել: Ամեն դեպքում, եթե հանդիպենք հայերին, դա կլինի կյանքի խաղ: Ինձ համար եղել է նման հանդիպում Ադրբեջանի պատանեկան հավաքականի կազմում: Միշտ մտածել ենք, որ եթե հայերին պարտվենք, ավելի լավ է հայրենիք չվերադառնանք: Այդպես կլինի նաև այս անգամ, եթե հանդիպումը տեղի ունենա»,- ասել է Հուսեյնովը:
Երեկ Հայաստանի հավաքականի հետ հնարավոր հանդիպման մասին էր խոսել Ադրբեջանի հավաքականի նորեկ «Քեշլյայի» պաշտպան Թառլան Գուլիևը: «Գիտակցում եմ, որ խմբում հաղթելու դեպքում հնարավոր է խաղանք Հայաստանի հետ: Դա կլինի կարիերայիս կարևորագույն խաղը: Ես պատրաստ եմ ճակատամարտել Հայաստանի դեմ»,- նշել էր Գուլիևը:
Ադրբեջանի ֆուտբոլի ֆեդերացիայի գլխավոր քարտուղար Էլհան Մամեդովը այսօր լրագրողներին հայտնել է, որ ՈՒԵՖԱ-ն ևս հավանական է համարում այդ խաղի կայացումը: «Դա կլինի չափազանց պրոբլեմատիկ խաղ: Այո, մենք չհայտնվեցինք միևնույն ենթախմբում, բայց հնարավոր է՝ խաղանք հաջորդ փուլում: ՈՒԵՖԱ-ից մեզ արդեն բանավոր զգուշացրել են, որ եթե Հայաստանի և Ադրբեջանի հավաքականները դառնան մրցակիցներ Ազգերի լիգայի խաղարկությունում, եվրոպական ֆուտբոլի գլխավոր կառույցի գործադիր կոմիտեն հատուկ որոշում կկայացնի այդ առթիվ: Որոշումը կլինի մասնավորապես հանդիպման վայրի, նույնիսկ կայանալ-չկայանալու վերաբերյալ: Կազմակերպչական տեսանկյունից սա չափազանց բարդ խնդիր է: Ամեն դեպքում վերջնական որոշումը կայացնելու են ՈՒԵՖԱ-ն և ՖԻՖԱ-ն, և մենք պարտավոր ենք ընդունել այն: Ինչ վերաբերում է խաղին և արդյունքին, այս պահին դժվար է ինչ-որ բան ասելը: Եկեք սպասենք և կենտրոնանանք խմբային փուլի վրա»,- հայտարարել է Գուլիևը: Վերջինս հրաժարվել է պատասխանել հարցին, թե ցանկանո՞ւմ է արդյոք, որ Հայաստանն ու Ադրբեջանը հանդիպեն:
Ավելի վաղ Ադրբեջանի հավաքականի գլխավոր մարզիչ Գուրբան Գուրբանովը լրագրողների հետ հանդիպմանն ասել էր, որ չի ցանկանա մրցել հայերի հետ: «Որքան գիտեմ, մրցաշարի կանոնադրության համաձայն՝ Հայաստանի հավաքականի հետ կարող ենք հանդիպել միայն եզրափակչում: Իհարկե, չէի ցանկանա, որ հանդիպենք թշնամի հայերի հետ, բայց դա մեզնից կախված չէ: Մենք պայքարելու ենք Ազգերի լիգայում հաղթողի կոչման համար, և ամենևին էլ կապ չունի, թե ում հետ ենք մրցելու»,- նշել Գուրբանովը:
Վերջինիս հայտարարությունը շատ ադրբեջանցիներ որակել են դարակազմիկ՝ պնդելով, որ հայերի հետ հանդիպումից վախենալը ոչ այլ ինչ է, քան դասալքություն: Ադրբեջանցի լրագրողները գրում էին, որ Գուրբանովը ուղղակի չի զգում արյան հոտը և վախենում է պատասխանատվությունից: Ըստ էության Գուրբանովի դիրքորոշումն այս հարցում ընդունելի է և հասկանալի:
Ազգերի լիգայի խաղարկությունը դեռևս չսկսված՝ ադրբեջանական մամուլը ֆուտբոլիստներին մարզիչներին, երկրպագուներին ստիպում է զգալ, իրենց բնորոշմամբ, արյան հոտը: Հիշեցնենք, որ Հայաստանի և Ադրբեջանի հավաքականները միևնույն ենթախմբում էին ընդգրկվել 2008 թվականի Եվրոպայի առաջնության ընտրական փուլում: Այն ժամանակ ևս հարևան երկրում ֆուտբոլային դիմակայությունը որակվեց որպես կյանքի և մահվան խաղ: Դրա հետևանքով ՈՒԵՖԱ-ն կայացրեց կտրուկ որոշում՝ չեղարկելով երկու հանդիպումները:
Բնական է, որ ՈՒԵՖԱ-ն ամենևին չի ցանկանա, որ Հայաստանն ու Ադրբեջանը նորից դառնան մրցակիցներ: Նման հանդիպում կազմակերպելը իսկապես հսկայական միջոցներ և ռեսուրսներ է պահանջում:
Ինչ վերաբերում է Հայաստանին, ապա մեզ համար այս պահին առաջնային է կենտրոնանալ խմբային փուլի և առաջիկա հանդիպումների վրա: Մեր գլխավոր նպատակը Ազգերի լիգայի խաղարկությունում պետք է լինի Եվրոպայի առաջնության ուղեգիր նվաճելը և ոչ թե Ադրբեջանին հաղթելը:
